يراك. كيركۋك. ءبىر كۇن بۇرىن. فوتو: Anadolu Agency

جاھاندىق ىندەت كەزىندە بىرقاتار ورتا شىعىس ەلدەرىندەگى داعدارىستان پايدالانىپ دايش سەكىلدى قاۋىپتى تەرەورلىق ۇيىمدار ءوز ارەكەتتەرىن جانداندىرا ءتۇستى. اپتا سوڭىندا اتالمىش تەررورلىق توپتىڭ قارۋلى سودىرلارى يراكتىڭ كيركۋك جەرىندە مۇناي كەشەنىنە شابۋىل جاسادى. 

بۇۇ-نىڭ تەرروريزمگە قارسى كۇرەس ۇيىمى مالىمەتتەرىنە قاراعاندا، "يسلام مەملەكەتى" تەررورلىق توبى ىندەت كەزىندەگى كارانتين شارالارىنان پايدالانىپ وزدەرىنىڭ جاسىرىن ارەكەتتەرىن كۇشەيتكەن. توپ وزىنە جاقتاستاردى يراك، ءسۇريا جانە اۋعانستان جەرىندە قايتا توپتاستىرۋدا. اتالمىش تەررورلىق توپ بۇعان دەيىن حالىقارالىق كواليتسيا جانە جەكەلەگەن ۇكىمەتتىك كۇشتەردىڭ سوققىسىنان تاس-تالقان بولعان ەدى.

يراك رەسميلەرى كيركۋكتاعى شابۋلدا ءولىم-ءجىتىم بولعانى تۋرالى مالىمەتتى تاراتپادى.

2014 جىلى وزدەرىن "يسلام مەملەكەتى" اتاعان تەررورلىق توپ يراكتىڭ ەكىنشى ءىرى قالاسى موسۋلدا "حاليفات" جاريالاپ، ەلدىڭ سولتۇستىك وڭىرلەرىن، ءسۇريانىڭ وڭتۇستىك جانە وڭتۇستىك شىعىس ايماقتارىن باقىلاۋىنا العان بولاتىن. 2017 جىلى جەلتوقساندا يراك ۇكىمەتى ەلدەگى دايش تەررورلىق توبىنا قارسى كۇرەستىڭ جەڭىسپەن اياقتالعانىن مالىمدەگەن.

تەررورلىق توپتىڭ جەڭىلىسىنە ءتورت جىل وتسە دە كيركۋك پەن يراك-ءسۇريا شەكارا ماڭىندا دايش سودىرلارى ءالى دە شابۋىلدارىن توقتاتپاي كەلەدى.

“The Qazaq Times”