ەل كۇتپەگەن ساپار: بلينكەن اۋعانستانعا باردى

ەۋروپادا جۇرگەن اقش مەملەكەتتىك حاتشىسى انتوني بلينكەن كۇتپەگەن جەردەن ۇشاعىنىڭ باسىن كابۋلعا بۇردى. ول بايدەننىڭ سوڭعى شەشىمدەرىن ءتۇسىندىرۋ ءۇشىن جانە اۋعان جەرىنەن اسكەر شىعارۋدىڭ دايىندىعىن تالقىلاۋ ماقساتىندا اۋعانستان پرەزيدەنتى اشراف عانيمەن جانە وزگە دە ەل باسشىلارىمەن كەزدەسپەك.

بىرەر كۇن بۇرىن عانا اق ءۇي باسشىسى جوۋ بايدەن اۋعانستانداعى امەريكالىق جاۋىنگەرلەردى 11 قىركۇيەككە دەيىن ەلگە قايتارىپ، اۋعانستانداعى سوعىستىڭ 20 جىلدىعىندا تولىقتاي ەلدەگى اسكەري وپەراتسيالاردى اياقتاۋ تۋرالى شەشىمىن جاريا ەتكەن ەدى. بۇدان 20 جىل بۇرىنعى نيۋ-يوركتە بولعان 11 قىركۇيەك وقيعاسىنان كەيىن، اقش اسكەرى اۋعانستانعا كىرگەن ەدى. سودان بەرى اۋعانستاننان امەريكالىق ساربازدار كەتكەن ەمەس، ءتىپتى ەڭ كوپ كەزىندە اقش-تىڭ 100 مىڭ جاۋنگەرى اۋعان جەرىندە تۇرعان بولاتىن.

Associated Press اقپارات اگەنتتىگىنىڭ حابارىنا قاراعاندا، بلينكەن اۋعانستانعا اقش اسكەرىنىڭ شەگىنۋىن وزدەرى قولداپ كەلگەن كابۋل بيلىگىنە ءتۇسىندىرۋ ءۇشىن باردى. ول كەزدەسۋلەردە اقش اسكەرىنىڭ ەلدەن كەتكەنىمەن ەكى ۇكىمەت اراسىنداعى قورعانىس ىنتىماقتاستىعى توقتاپ قالمايتىنىن جەتە تۇسىندىرمەك. «بۇل ساپار امەريكا قۇراما شتاتتارى مەن وسى ءبىر يسلام رەسپۋبليكاسى جانە اۋعان حالقى اراسىنداعى ىنتىماقتاستىقتىڭ ناتيجەلى بولعانىن تۇسىندىرەدى دەپ سەنەمىن»، – دەپتى بلينكەن پرەزيدەنت عانيمەن كەزدەسكەن كەزدە. ول سونداي-اق، «سەرىكتەستىكتىڭ وزگەرگەنىن»، الايدا بۇل قارىم-قاتىناس ءالى دە ۇزاق ۋاقىتقا سوزىلا بەرەتىنىن جەتكىزگەن.

سونداعى اشراف عانيدىڭ ايتقان ءسوزى: «ءبىز بۇل شەشىمدەرىڭىزدى قۇرمەتتەيمىز، بۇل اۋەلى ءبىزدىڭ ءتارتىپتى رەتتەيدى»، –  دەگەن.

كابۋلعا ۇشۋدان بۇرىن اقش مەم. حاتشىسى مەن قورعانىس ءمينيسترى ناتو باس حاتشىسى جانە وزگە دە جەتەكشىلەرىمەن كەزدەسكەن. ولار اۋعانستان ءىسى بويىنشا ارەكەتتەرىن ۇيلەستىرۋگە كەلىسكەن. سونداي-اق، اۋعانستانداعى 20 جىلدىق سوعىسقا باعا بەرگەن، ايتالىق، اۋعانستاندا بين لادەننىڭ تەررورلىق ۇيىمىن جويىپ، تالىپتەردى بيلىكتەن قۇلاتىپ، ەلدەگى تەرروريستىك توپتاردى تازارتتىق دەگەن. الايدا، قازىر ەلدە تەررورلىق توپتار قايتا كوبەيدى، تالىپتەردىڭ بيلىك اۋقىمى ەلدىڭ باسىم اۋماعىنا كەڭەيىپ كەتتى.

قازىر اۋعانستاندا ون مىڭنان استام شەتەلدىك كۇشتەر بار. ونىڭ 7 مىڭنان استامى ناتو-نىڭ، 2500-ءى اقش اسكەرى. بۇدان تىس بۇۇ-نىڭ قاۋىپسىزدىك كۇشتەرى دە بار. ۋاشينگتوننىڭ شەشىمىنەن كەيىن ناتو دا بىردەن مالىمدەمە جاساپ، اۋعان جەرىندەگى اسكەرلەرىن تاياۋ بىرنەشە ايدا كەرى الىپ كەتەتىنىن ايتقان.

“The Qazaq Times”