تۇركسىب اۋدانىنداعى «جەلتوقسان» ساياباعى. فوتو: www.inalmaty.kz

الماتى قالاسىنىڭ اكىمدىگى مەن ءماسليحاتى «جاس قانات» ىقشام اۋدانىنداعى ساياباققا «جەلتوقسان-86» اتاۋىن بەرۋ تۋرالى شەشىم قابىلدادى.

رەسپۋبليكالىق ونوماستيكا كوميسسياسى 7 ساۋىردە وسىنداي قورىتىندى شىعارعان. ساعىنتاەۆ قول قويعان قاۋلىعا سايكەس ساياباق رەسمي تىركەۋگە الىنباق. «اشىق نقا» سايتىندا جاريالانعان قاۋلى 29 ساۋىرگە دەيىن قوعام تالقىسىندا بولادى. اتاۋدىڭ كىم ۇسىنعانى جانە قالاي تاڭدالعانى تۋرالى مالىمەت بەرىلمەگەن. ساياسي ءمانى بار اتاۋ بەرىلگەن ەكى بىردەي ساياباق ىرگەلەس تۇر.

اكىمدىك وكىلى ينديرا انديروۆا «جەلتوقسان» ساياباعىنىڭ بىلتىر 54 گا اۋماعى جوندەۋدەن وتكەنىن، بيىل 24 گا كولەمدى الىپ جاتقان ماياك ورمانىن اباتتاندىرۋ جۇمىسى جاسالاتىنىن حابارلادى. وسى ورمانعا «جەلتوقسان-86» اتاۋى بەرىلەدى. قالا بيلىگى الداعى ۋاقىتتا ەكى ساياباقتى بىرىكتىرمەك.

تۇركسىب اۋدانى جاس قانات ىقشام اۋدانىنداعى جاپسارلاس ورنالاسقان ساياباقتار. فوتو: 2Gis.kz سايتىنان سكرين-قيىندى

رەكرەاتسيا ايماعىنا كىرەتىن ساياباق تۇركسىب اۋدانىندا ورنالاسقان. بۇعان دەيىن 2020 جىلى تاۋەلسىزدىك كۇنى قارساڭىندا ماياك ورمانىنا ىرگەلەس جەردە «جەلتوقسان» ساياباعى اشىلعان. اكىمدىك 100 گەكتار اۋماقتىڭ 23 مىڭ شارشى مەتر اۋدانىن كوگالداندىرۋعا ۋادە بەرگەن. رەسمي دەرەك بويىنشا، مۇندا 125 ورىندىق جانە 130 قوقىس جاشىگى ورناتىلعان. جاياۋ جۇرگىنشىلەر جولى 1200 م. سونداي-اق، ساياباقتا 8 بالالار جانە 7 سپورت (workout, شاعىن فۋتبول جانە ستريتبول) الاڭدارى بار. ءبىر ساياباققا بيۋدجەتتەن كەمىندە 600 ملن تەڭگە جۇمسالعان.

جەلتوقساندا اشىلعان «جەلتوقسان» ساياباعى. فوتو: الماتى قالاسىنىڭ اكىمدىگى

“The Qazaq Times”