فوتو: static.com

اقش-تا ازىق-تۇلىك پەن ءدارى-دارمەك ساپاسىن باقىلاۋ باسقارماسى مەن اۋرۋلاردى باقىلاۋ ورتالىعى Johnson & Johnson كومپانياسىنىڭ ۆاكتسيناسىن قولدانۋدى توقتاتۋدى ۇسىندى. اتالعان ەكپەنى قابىلداعان 6 ادامدا قاننىڭ ۇيۋى تىركەلىپ، بىرەۋى كوز جۇمعان. وسى ماسەلەگە بايلانىستى بۇگىن اۋرۋلاردى باقىلاۋ جانە الدىن الۋ ورتالىعىنىڭ يممۋنداۋ تاجىريبەسى جونىندەگى كوميتەتى شۇعىل وتىرىس وتكىزەدى. 

بىراق قاننىڭ ۇيۋى ناقتى نەدەن بولعانى ازىرگە دالەلدەنگەن جوق. اقش-تا قازىرگە دەيىن تۇرعىندارعا وسى ۆاكتسينانىڭ 6,8 ميلليون دوزاسى سالىنعان.

قاڭتاردا بەلگيالىق Janssen (Johnson & Johnson برەندىنە تيەسىلى) كومپانياسى وندىرگەن كوروناۆيرۋسقا قارسى ەكپەسىنىڭ ءبىر دوزاسى سىناق كەزىندە 66% تيىمدىلىك كورسەتكەن. كومپانيا بيىل ءبىر ميلليارد دوزا شىعارۋدى جوسپارلاعان. سىناق ناتيجەسى انىقتالعاننان كەيىن اقش بۇل كومپانياعا الدىن الا 100 ميلليون دوزاعا، كانادا 38 ميلليون دوزاعا، ۇلىبريتانيا 30 ميلليون دوزاعا تاپسىرىس بەرگەن.

بۇعان دەيىن ەۋروپا ەلدەرى AstraZeneca ەكپەسىن دە ساتىپ الۋدان باس تارتقان. سەبەبى «پرەپاراتتىڭ قان اينالىمىن ناشارلاتىپ، ترومبىلاردىڭ تۇزىلۋىنە ىقپال ەتەدى» دەگەن بولجامدار ايتىلدى. كانادادا اتالعان ەكپەنى 55 جاستان اسقاندارعا سالۋعا تىيىم سالىندى.

الەمدە Janssen مەن Novavax ەكپەسى ءۇشىنشى سىناق كەزەڭىنەن ءوتىپ، ناتيجەسىن رەسمي تۇردە جاريالاعان بەس ۆاكتسينانىڭ قاتارىنا ەنگەن. بۇعان دەيىن Pfizer/BioNTech (اقش/گەرمانيا), Moderna (اقش), Oxford/AstraZeneca (ۇلىبريتانيا) ەكپەلەرى سىناق كەزىندە جوعارى تيىمدىلىك كورسەتكەن. ءۇش ەكپە دە الەمنىڭ ءبىراز ەلىندە ماقۇلداندى. رەسەيلىك سپۋتنيك-V ەكپەسى دە بىرنەشە مەملەكەتتە ماقۇلداندى.

Pfizer/BioNTech ەكپەسى مەن Moderna ۆاكتسيناسىنىڭ تيىمدىلىگى 95% دەپ حابارلاندى. ال Oxford/AstraZeneca ۆاكتسيناسىنىڭ تيىمدىلىگى 62-90% دەپ جاريالاندى.

"The Qazaq Times"