فوتو: The Wall Street Jounal

اقش-تىڭ بۇرىنعى ۇكىمەتىندە قىزمەت اتقارعان شەنەۋنىكتەردىڭ ايتۋىنشا، سولتۇستىك كورەيا ەڭ بەرى بولعاندا 15 ءساۋىر كۇنى التىنشى رەتكى جاڭا يادرولىق سىناققا دايىندالىپ جاتىر. بۇل ترامپقا اقش-قىتاي قارىم-قاتىناسىن ويداعىداي دامىتۋعا يتەرمەلەيتىنى انىق.

ترامپنىڭ سارسەنبى كۇنى تانىمال «The Wall Street Journal» باسىلىمىنا بەرگەن سۇحباتىندا، اقش-قىتاي ساۋدا قاتىناسىن جاقسارتۋ ءۇشىن جاڭا مارشرۋتتاردى ىسكە قوسۋ جوباسىنىڭ بار ەكەنى ايتقان. بۇل دا سولتۇستىك كورەيا باسشىسى كيم چەن ىننىڭ رەجيمىن شەكتەۋگە ىقپال ەتەدى دەپ وتىر. ەڭ ماڭىزدىسى ترامپ ەگەر قىتاي سولتۇستىك كورەيانى شەكتەۋدە اقش-تى قولداسا وعان ەكونوميكالىق زور تيىمدىلىكتەردى جاسايتىنىن قايتا-قايتا ايتتى.

اق ۇيدەگى وزگە شەندىلەردىڭ ايتۋىنشا، سوڭعى بىرنەشە كۇندە سولتۇستىك كورەيا سولتۇستىك شىعىس وڭىرىندەگى پۋڭگيە-ري (Punggye Ri) يادرولىق سىناق پوليگونىندا قاربالاستىق باستالعان. بۇل وسى اپتادا حالىقارالىق قاۋىپسىزدىككە ساياتىن ءبىر ءىستىڭ بولعالى تۇرعانىن ايعاقتايدى دەيدى اقش شەندىلەرى.

ترامپ سولتۇستىك كورەيانى اۋىزدىقتاۋ ءۇشىن قىتايمەن ۇزاق مەرزىمدى ستراتەگيالى شارت جاساسۋعا ۇمىتكەر. ال، جاقىن كۇندە جاساعالى وتىرعان يادرولىق سىناق ترامپتىڭ وسى ويىنا ۇلكەن كەدەرگى بولعالى تۇر. س.كورەيانىڭ اقپارات قۇرالدارى 15 ساۋىردەگى كيم ير سەننىڭ تۋعان كۇنىنە وراي اقش پەن وزگە الەم ەلدەرىنە وزدەرىن ايگىلەيتىنىن قايتا-قايتا ايتىپ ەسكەرتۋدە. اقش جوعارى لاۋازىمدى وكىلدەرى بۇل سيگنال يادرولىق سىناقتىڭ نەمەسە بالليستيكالىق زىمىراننىڭ ەسكەرتۋى بولۋى مۇمكىن دەپ وتىر.

سوڭعى كەزدە سپۋتنيكتەن تۇسىرىلگەن سۋرەتتەرگە قاراعاندا، پوليگون ماڭىندا اسكەريلەردىڭ قاربالاس قيمىلى انىق بايقالادى. سولتۇستىك كورەيا وسىعان دەيىن بەس رەت جەر استى يادرولىق سىناقتارىن جۇرگىزدى. العاشقى سىناق 2006 جىلدان باستالعان بولاتىن.

ترامپ «اۋعانستانعا تاستالعان بومبانىڭ سولتۇستىك كورەيا ەسكەرتۋ جاساۋ ءۇشىن بە؟» دەگەن سۇراقتى تەرىستەدى. ول: «سولتۇستىك كورەيا ماسەلەسى ءوز الدىنا بولەك ماسەلە. ونى شەشۋ دە وتە ساق بولۋمىز كەرەك»، – دەگەن. دەسە دە ترامپ قاتاڭ تۇردە، اقش ۇكىمەتى مەن اسكەري كۇشتەردىڭ وسى اپتا سوڭىنداعى سولتۇستىك كورەيانىڭ قانداي دا ءبىر ارانداتۋشىلىق ارەكەتىنە پارمەندى جاۋاپ بەرۋگە دايىن ەكەنىن ايتتى.

اقش قورعانىس دەپارتامەنتىنىڭ حابارلاۋىنشا اقش ارمياسى سولتۇستىك كورەيانىڭ زىمىران سىناقتارىن جۇزەگە اسىرماي، زىمىرانعا قارسى جۇيەمەن ۇستاپ الۋعا قابلەتتى. مۇنداي زىمىران ۇستاۋشى وقتار جاپون تەڭىزىنەن كوتەرىلەدى دەگەن مالىمەت بەردى.

“The Qazaq Times”