بريتانيا پارلامەنتى شىڭجاڭداعى ءماجبۇرلى ەڭبەك ارقىلى وندىرىلگەن تاۋارلاردى قابىلدادى دەپ ءوز ەلىندەگى كومپانيالاردى سىنعا الا باستادى. ەندىگى جەردە بريتان ۇكىمەتى ازاماتتاردى ءماجبۇرلى ەڭبەككە جەگۋ ارقىلى وندىرىلگەن تاۋارلاردان باس تارتپاعان وتاندىق كومپانيالاردى قارا تىزىمگە ەنگىزبەك.

قازىر اقش پەن بريتانيا جانە بىرقاتار باتىس ەلدەرىنىڭ شىڭجاڭداعى ءونىدىرىس ورىندارىمەن جۇمىس ىستەيتىن كومپانيالارى ءوز قابىلداعان تاۋارلارىنىڭ ءماجبۇرلى ەڭبەككە قاتىسى جوق ەكەنىن دالەلدەۋى ءتيىس. ەگەر بۇنداي دالەلسىز جانە شىڭجاڭ جەرىندە وندىرىلگەن تاۋارلار بولسا شەكتەۋگە ۇشىرايدى. ال، بريتان بيلىگىنىڭ شىڭجاڭمەن ىستەستىك ورناتقان كومپانيالارعا دەگەن تالابى بارىنەن قاتال. ولار ءماجبۇرلى ەڭبەكپەن قاتىسى جوق ەكەنىن دالەلدەي الماسا قارا تىزىمگە ەنەدى، ءتىپتى قازىر بريتان دەپۋتاتتارى ونداي كومپانيالار قارا تىزىمگە الىنىپ قانا قالماستان، سانكتسيالانۋى كەرەك دەپ سانايدى.

اعىلشىن دەپۋتاتتارى بۇل تۋراسىنداعى 2015 جىلعى زاڭنىڭ ەسكىرگەنىن، قازىرگى شىڭجاڭ جاعدايىنا قاراي جاڭارتىلۋى ءتيىس دەگەن تالاپ قويۋدا. بريتان جانە اقش جاساعان مالىمدەمەدە، شىڭجاڭداعى از ساندى ۇلت وكىلدەرى ماقتا اتىزدارىندا جانە ءوندىرىس ورىندارىندا ەركىنەن تىس جۇمىسقا تارتىلعان دەلىنگەن. قىتاي الەمدە ماقتا ءوندىرىسىنىڭ بەستەن ءبىرىن يەلەيدى. ال، قىتاي ماقتا ءوندىرىسىنىڭ جارتىسىنان كوبىن شىڭجاڭدا وندىرەدى.

رەسمي بەيجىڭ مۇنداي ايىپتاردى شەتكە قاعاۋدا. الايدا، بريتان، اقش باستاعان دەموكراتيالىق ەلدەر بۇل ماسەلە تۋرالى قاتاڭ ۇستانىمدا بولاتىنىن اڭعارتتى.

“The Qazaq Times”