ەۋرووداق ۇلىبريتانياعا ۆاكتسينا ەكسپورتتاۋدى توقتاتپاق

ەۋرووداق ۇلىبريتانياعا كوروناۆيرۋسقا قارسى ۆاكتسينا ەكسپورتتاۋدى توقتاتۋى مۇمكىن. ۆۆس-ءدىڭ حابارلاۋىنشا، بريتانيالىق «AstraZeneca» كومپانياسى وداققا كەلىسىلگەن ەكپە كولەمىن جەتكىزبەگەن. ال ەۋروپادا ىندەتتىڭ ءۇشىنشى تولقىنى باستالعاندىقتان، وداق اۋماعىندا پرەپارات جەتپەي، قيىن جاعداي تۋىنداۋى مۇمكىن.

ال ۇلىبريتانيا سىرتقى ىستەر ءمينيسترى دومينيك رااب ەۋروكوميسسيانىڭ مالىمدەمەسى ەكى ەل اراسىنداعى قاتىناستى شيەلەنىستىرۋى مۇمكىن ەكەنىن ايتادى. سەبەبى ەۋرووداق بۇعان دەيىن ۆاكتسينانى ەكسپورتتاۋدا ەشقانداي شەكتەۋ بولمايتىنىن ۋادە ەتكەن دەيدى.

قازىر ەۋروپاداعى بىرقاتار ساياسي كۇش جانە كەي مەملەكەت ەۋروكوميسسيانىڭ ۆاكتسينالاۋ جونىندەگى ساياساتىن سىناپ وتىر. قازىرگى ساياسات اياسىندا، ۆاكتسينا ساتىپ الۋ مەن ۇلەستىرۋ ورتالىق سانالاتىن بريۋسسەل ارقىلى ءجۇرىپ وتىر. ال مەملەكەتتەردىڭ ەۋروكوميسسيانى اينالىپ ءوتىپ وزدىگىنەن ساتىپ الۋ مۇمكىندىگى شەكتەلىپ وتىر.

بۇعان دەيىن ەۋرووداق مۇشە ەلدەردىڭ حالقىن كوروناۆيرۋسقا قارسى ۆاكتسينالاۋ جونىندە قاتەلىك جىبەرگەن بولۋى مۇمكىن دەدى ەۋروكوميسسيا توراعاسىنىڭ ورىنباسارى فرانس تيممەرمانس. ول قاتەلىكتى ەۋرووداق بيلىگى دە، جەكەلەگەن ەل ۇكىمەتتەرى دە جىبەرگەن بولۋى مۇمكىن دەدى. سويتە تۇرا ول ەپيدەميانىڭ اياقتالۋىن كۇتۋگە شاقىردى. ونىڭ سوزىنشە، تەك سول كەزدە قاتە جانە دۇرىس شەشىمدەردىڭ ارا-قاتىناسىن انىقتاۋعا بولادى.

13 ناۋرىزدا اۆستريا، چەحيا، سلوۆەنيا، بولگاريا، حورۆاتيا جانە لاتۆيا ەلدەرى ەۋرووداقتىڭ توتەنشە ءسامميتىن وتكىزۋگە شاقىردى. ولاردىڭ سوزىنشە، قازىر ەۋرووداق مۇشەلەرى اراسىندا ۆاكتسينالاۋ جونىندە تەپە-تەڭدىك جوق. اتالعان ەلدەر سامميتتە وسى ماسەلە تالقىلانۋى ءتيىس دەيدى.

بىرنەشە مەملەكەت ەۋرووداق ىشىندە ۆاكتسينالاۋ دەڭگەيىنىڭ اقش پەن ۇلىبريتانيانىكىنەن قالىپ قويعانىن سىنعا العان. كەيىنگى دەرەكتەرگە قاراعاندا، ورتاشا ەسەپپەن ەۋرووداق حالقىنىڭ 10%-ى ۆاكتسينانىڭ كەمى ءبىر دوزاسىن العان. بىراق لاتۆيا مەن بولگاريا سەكىلدى ەلدەردىڭ كورسەتكىشى بۇل مەجەدەن ەداۋىر تومەن. ال ۇلىبريتانيا حالىقتىڭ ۇشتەن ءبىر بولىگى ۆاكتسينانىڭ كەمى ءبىر دوزاسىن الىپ ۇلگەرگەن.

"The Qazaq Times"