يمانبەك ماراپتتاۋ راسىمىندە. فوتو: www.grammy.com تىكەلەي ەفيرىنەن سكرين-قيىندى

قازاقستان ونەرىنىڭ جاڭا تاريحىندا تۇڭعىش Grammy سىيلىعىن پاۆلودار ءوڭىرىنىڭ تۋماسى يمانبەك زەيكەنوۆ قانجىعالادى.

الەمدىك مۋزىكا باعىتىنداعى ايتۋلى سىيلىقتاردىڭ ءبىرى Grammy («گرەممي») جۇلدەسىنىڭ 63-ءىنشى سالتاناتتى ماراپاتتاۋ ءراسىمى جاھاندىق پاندەميا جاعدايىنا بايلانىستى ونلاين ءوتتى. زەيكەنوۆتىڭ امەريكالىق رەپەر Saint Jhn-نىڭ «Roses» كومپوزيتسياسىنا (2016) ارناپ 2019 جىلى جاساعان رەميكسى ۇزدىكتەر قاتارىندا اتالدى. وسىلايشا ول Grammy ۇتقان العاشقى قازاقستاندىق اتاندى.

«ەڭ ۇزدىك رەميكس» نوميناتسياسىنىڭ جەڭىمپازى اتانعان ول ۆيدەوەفيردە: «اناما، اكەمە، كومانداما، مەنەدجەر كيريلگە راحمەت! «گرەمميگە» راقمەت!»، – دەپ جاقىندارىنا العىسىن ءبىلدىردى.

ونىڭ شىعارماسى «حيت» بولعانىن ترەكتىڭ «Billboard Hot 100» ۇزدىك وندىعىندا 4 ايداي تۇرعانىنان بايقاۋ قيىن ەمەس. رەميكس Apple Music-ءتىڭ تور-10 قاتارىنا كىردى، Shazam مۋزىكالىق قوسىمشاسىندا 22 ملن قارالىم جيناپ، ۇزاق ۋاقىت بويى «ياندەكس. مۋزىكا» چارتىندا العاشقى ورىننان كورىندى.

«ءار مۋزىكانتتىڭ مانساپ جولىنداعى ەڭ كەرەمەت ءسات – Grammy سىيلىعىن الۋ. ءبىز وسى جەتىستىككە قول جەتكىزدىك!» دەپ جازادى اۆتور.

جۋىردا ونەرپاز Imanbek Rita Ora جانە David Guetta سياقتى الەمگە ايگىلى مۋزىكانتتارمەن بىرگە ءان جازعان.

يمانبەك زەيكەنوۆ وسىعان دەيىن ءوزى تۇراتىن پاۆلودار وبلىسىنىڭ اقسۋ قالاسىندا تەمىرجولشى بولىپ ىستەگەن.

بىلتىر جازدا امەريكالىق New York Times گازەتى 19 جاستاعى Imanbek تۋرالى ماقالا جاريالاعان.

Grammy دەگەن نە؟*

Grammy – ادەبيەت سالاسىندا نوبەل، كينەموتوگرافيادا «وسكار»، تەلەۆيزيادا «ەممي»، تەاتردا «توني» جۇلدەسى سەكىلدى مۋزىكا بويىنشا بەرىلەتىن ەڭ جوعارعى سىيلىق. التىن جالاتىلعان گرامموفون بەينەسىندەگى ستاتۋەتكا.
1957 جىلى گرامموفوندى ويلاپ تاپقان توماس ەديسوننىڭ 80 جىلدىعىن اتاپ ءوتۋ كەزىندە كاسىبي مۋزىكانتتار مۋزىكا سالاسىندا جۇلدە تاعايىنداۋ تۋرالى يدەيا شىعارادى. سيمۆول رەتىندە گرامموفون بەينەسى ءبىر اۋىزدان قابىلدانادى. رەسمي تۇردە اقش-تىڭ ونەر جانە دىبىس جازۋ اكادەمياسى 1958 جىلدىڭ 14 ناۋرىز كۇنى تۇڭعىش رەت جۇلدە تۋرالى جاريالاعان. بۇل ءىس-شاراعا فرەنك سەناترا قاتىسىپتى. ال 1959 جىلى 4 مامىردا لوس-انجەلەس جانە نيۋ-يوركتە العاش رەت جۇلدە تاپسىرعان ەكەن.
1958 جىلدان بەرى مۋزىكا جۇلدەسى تۋرالى ەرەجە تالاي رەت وزگەرىپ، تولىعىپ وتىرعان. قازىر مۋزىكا سالاسىنا تىعىز بايلانىستى 30 جانر بويىنشا 84 كاتەگوريا بەكىتىلگەن.
«گرەممي» سىيلىعىن العان مىناداي بەلگىلى ادامدار مەن مۋزىكالىق توپتار بار: فرەنك سيناترا، The Beatles, The Rolling Stones, ستينگ، ەلۆيس پرەسلي، دجون لەننون، تينا تەرنەر، دجوردج بەنسون، بي بي كينگ، بوب ديلان، ۋيتني حيۋستون، مادوننا، بەيونسە، رياننا. ديريجەر گەورگ شولتي 31 رەت (رەكورد), «U2» توبى 22 رەت، مايكل دجەكسون 13 رەت العان ەكەن.
(*دارمەن ايشۋاقۇلىنىڭ نۇسقاسىنداعى ۆيكيدەرەك اۋدارماسى)

"The Qazaq Times"