Иманбек марапттау рәсімінде. Фото: www.grammy.com тікелей эфирінен скрин-қиынды

Қазақстан өнерінің жаңа тарихында тұңғыш Grammy сыйлығын Павлодар өңірінің тумасы Иманбек Зейкенов қанжығалады.

Әлемдік музыка бағытындағы айтулы сыйлықтардың бірі Grammy («Грэмми») жүлдесінің 63-інші салтанатты марапаттау рәсімі жаһандық пандемия жағдайына байланысты онлайн өтті. Зейкеновтің америкалық рэпер Saint Jhn-ның «Roses» композициясына (2016) арнап 2019 жылы жасаған ремиксі үздіктер қатарында аталды. Осылайша ол Grammy ұтқан алғашқы қазақстандық атанды.

«Ең үздік ремикс» номинациясының жеңімпазы атанған ол видеоэфирде: «Анама, әкеме, командама, менеджер Кирилге рахмет! «Грэммиге» рақмет!», – деп жақындарына алғысын білдірді.

Оның шығармасы «хит» болғанын тректің «Billboard Hot 100» үздік ондығында 4 айдай тұрғанынан байқау қиын емес. Ремикс Apple Music-тің ТОР-10 қатарына кірді, Shazam музыкалық қосымшасында 22 млн қаралым жинап, ұзақ уақыт бойы «Яндекс. Музыка» чартында алғашқы орыннан көрінді.

«Әр музыканттың мансап жолындағы ең керемет сәт – Grammy сыйлығын алу. Біз осы жетістікке қол жеткіздік!» деп жазады автор.

Жуырда өнерпаз Imanbek Rita Ora және David Guetta сияқты әлемге әйгілі музыканттармен бірге ән жазған.

Иманбек Зейкенов осыған дейін өзі тұратын Павлодар облысының Ақсу қаласында теміржолшы болып істеген.

Былтыр жазда америкалық New York Times газеті 19 жастағы Imanbek туралы мақала жариялаған.

Grammy деген не?*

Grammy – әдебиет саласында Нобель, кинемотографияда «Оскар», телевизияда «Эмми», театрда «Тони» жүлдесі секілді музыка бойынша берілетін ең жоғарғы сыйлық. Алтын жалатылған граммофон бейнесіндегі статуэтка.
1957 жылы граммофонды ойлап тапқан Томас Эдисонның 80 жылдығын атап өту кезінде кәсіби музыканттар музыка саласында жүлде тағайындау туралы идея шығарады. Символ ретінде граммофон бейнесі бір ауыздан қабылданады. Ресми түрде АҚШ-тың Өнер және дыбыс жазу Академиясы 1958 жылдың 14 наурыз күні тұңғыш рет жүлде туралы жариялаған. Бұл іс-шараға Фрэнк Сенатра қатысыпты. Ал 1959 жылы 4 мамырда Лос-Анжелес және Нью-Иоркте алғаш рет жүлде тапсырған екен.
1958 жылдан бері музыка жүлдесі туралы ереже талай рет өзгеріп, толығып отырған. Қазір музыка саласына тығыз байланысты 30 жанр бойынша 84 категория бекітілген.
«Грэмми» сыйлығын алған мынадай белгілі адамдар мен музыкалық топтар бар: Фрэнк Синатра, The Beatles, The Rolling Stones, Стинг, Элвис Пресли, Джон Леннон, Тина Тернер, Джордж Бенсон, Би Би Кинг, Боб Дилан, Уитни Хьюстон, Мадонна, Бейонсе, Рианна. Дирижер Георг Шолти 31 рет (рекорд), «U2» тобы 22 рет, Майкл Джексон 13 рет алған екен.
(*Дәрмен Айшуақұлының нұсқасындағы викидерек аудармасы)

"The Qazaq Times"