كەشە، 11 ناۋرىزدا قىرعىزستان پرەزيدەنتى سادىر جاپاروۆ وزبەكستانداعى رەسمي ساپارىن باستاپ، پرەزيدەنت شاۆكات ميرزيەەۆپەن كەزدەستى. تاراپتار، وزبەك پەن قىرعىز قارىم-قاتىناسىن باياندى دامىتۋ تۋرالى كەڭەسىپ، ديپلوماتيالىق بايلانىستاردى ودان سايىن نىعايتۋدى، ەكى ۇكىمەت اراسىنداعى مامىلەنى كۇشەيتۋدى تالقىلادى.

سادىر جاپاروۆ وزبەكستان ساپارى بارىسىندا جاڭا 22 كەلىسىمگە قول قويعان. ولار نەگىزىنەن ەكى ەل اراسىنداعى سۋ جانە ەنەرگەتيكا، قاۋىپسىزدىك جانە اتكەزشىلىككە (كونتراباندالىق) قارسى كۇرەسۋ سەكىلدى مازمۇنداردى قامتيدى.وزبەك پەن قىرعىز جەتەكشىلەرى كەزدەسۋدەن كەيىن جاساعان مالىمدەمەلەرىندە، تالقىنىڭ نەگىزىنەن ساۋدا-ەكونوميكالىق بايلانىستى دامىتىپ، ەكى تاراپتان دا كاسىپكەرلەرگە، ساۋدا جوبالارىنا مۇمكىندىكتەر اشىپ بەرۋ تۋرالى سويلەسكەندەرىن ايتقان. پرەزيدەنت جاپاروۆ مالىمدەمەسىندە قىرعىزستان تارابى ساۋدا كولەمىن 2 ملرد اقش دوللارىنا دەيىن جەتكىزۋ مىندەتىن العانىن اتاپ وتكەن.

وزبەكستان بيلىگىنە شاۆكات ميرزيەەۆ كەلگەننەن كەيىن وعان دەيىن تىم جاقسى بولماي تۇرعان وزبەك-قىرعىز قاتىناسى جاقسارا باستادى. سوڭعى 3- جىل ىشىندە تاشكەنت پەن بىشكەك مامىلەلەردى دامىتۋدا كوپ ىلگەرى باستى. وزبەكستاننىڭ قازىرگى بيلىگى ءوز كەزەگىندە قىرعىزستانداعى جاعدايعا نازار اۋدارىپ وتىرعانىن اڭعارتىپ كەلەدى. بىلتىر قازاننىڭ باس شەنىندە بولعان قىرعىزستانداعى ساياسي داعدارىس تۇسىندا دا تاشكەنت تارابى الدىمەن مالىمدەمە جاساپ، تاراپتاردى مامىلەگە كەلۋگە شاقىرىپ ەدى. بۇعان قوسا تاشكەنت بيلىگى پاندەميا كەزىندە دە قىرعىزستان مەن تاجىكستانعا قارجىلاي جانە ماتەريالدىق كومەك بەرگەنى بار.

سادىر جاپاروۆ وزبەكستان پرەزيدەنتى شاۆكات ميرزيەەۆپەن بىرلەسكەن مالىمدەمە جاسادى. قىرعىز باسشىسى بۇل ساپارىندا وزبەك ۇكىمەتىنىڭ بىرقاتار  جوعارى جەتەكشىلەرىمەن دە كەزدەسۋدى جوسپارلاعان.

“The Qazaq Times”