فوتو: https://tengrinews.kz

راتيفيكاتسيالاۋ پروتسەسى شامامەن ءۇش جىلعا سوزىلعان ارمەنيا مەن ەۋروپالىق وداق اراسىنداعى جان-جاقتى جانە كەڭەيتىلگەن سەرىكتەستىك تۋرالى كەلىسىمگە قول قويىلدى. 2017 جىلعى 24 قاراشادا قول قويىلعان قۇجاتتىڭ ەرەجەلەرى 1 ناۋرىزدان باستاپ كۇشىنە ەنەدى.

ارمەنيا ءسىم راتيفيكاتسيالاۋ پروتسەسىنىڭ اياقتالۋىنا قاتىستى مالىمدەمەدە اتالعان كەلىسىم ارمەنيا مەن ەۋرووداق اراسىنداعى ەكىجاقتى قاتىناستاردى جاڭا دەڭگەيگە كوتەرەتىنىن اتاپ ءوتتى. قۇجات ساياسي جانە ەكونوميكالىق سالالارداعى جان-جاقتى ديالوگتى رەتتەيدى.

ارمەنيانىڭ سىرتقى ساياسي ۆەدومستۆوسىنىڭ مالىمەتىنشە، تاراپتار الداعى ۋاقىتتا ءتۇرلى سالالارداعى، اتاپ ايتقاندا، سوت تورەلىگى، قاۋىپسىزدىك، ەكونوميكا، اۋىل شارۋاشىلىعى، ءبىلىم جانە عىلىم، مادەنيەت جانە دەنساۋلىق ساقتاۋ سالالارىنداعى ىنتىماقتاستىق ورناتادى.

ءسىم حابارلاماسىندا: «كەلىسىمدى ءتيىمدى ورىنداۋ ارمەنيا ازاماتتارىنا ەلەۋلى ناتيجەلەر اكەلەدى. جاڭا رەفورمالار دەموكراتيانى، ساياسي، ەكونوميكالىق جانە الەۋمەتتىك تۇراقتىلىقتى نىعايتۋعا ىقپال ەتەدى، ۋاقىت وتە كەلە ازاماتتاردىڭ ءال-اۋقاتى مەن ءومىر ءسۇرۋ دەڭگەيىنە اسەر ەتەدى»، –دەلىنگەن.

قۇجاتتا سونداي-اق تاۋلى قاراباق قاقتىعىسىن بەيبىت جولمەن رەتتەۋ قاراستىرىلادى. وسىعان بايلانىستى ەو-نىڭ ەقىۇ مينسك توبىنىڭ تەڭ توراعالارى قاتىستىرىلماق.

"The Qazaq Times"