2020 جىلى اۋعانستانداعى قارۋلى شابۋىلداردان 3 مىڭنان استام بەيبىت تۇرعىن كوز جۇمعان. بۇل مالىمەتتى بىرىككەن ۇلتتار ۇيمىنىڭ اۋعانستانعا كومەك ميسسياسى جاريالادى. مالىمەتكە ساي، قازا بولعانداردىڭ 43 پايىزى ايەلدەر مەن بالالار.

پرەزيدەنت ترامپ كەزىندە اۋعانستانداعى «تاليبان» قوزعالىسىمەن بىرقاتار ماڭىزدى كەلىسسوز جۇرگىزىلىپ، جيىرما جىلعا جۋىق سوعىستى توقتاتۋ تۋرالى كەلىسىمگە قول جەتكىزگەن. الايدا، بۇل كەلىسىمدەردەن كەيىن اۋعان جەرىندەگى ىشكى قاقتىعىستار ءورشىدى. تالىپتەر رەجيم كۇشتەرىنە شابۋىلىن كوبەيتتى، وعان قوسا ەلدەگى ءتۇرلى تەررورلىق ۇيىمدار دا قارۋلى شابۋىلدار ۇيىمداستىردى.

بۇۇ UNAMA تاراتقان مالىمەتكە سايكەس، 2020 جىلى ەلدەگى قارۋلى شابۋىلداردان 3035 ادام قازا تاۋىپ، 5785 ادام جاراقات العان. بۇۇ اۋعانستانعا كومەك بەرۋ ميسسياسى 2014 جىلدان بەرى ەلدەگى قاقتىعىستان قازا تاپقانداردىڭ ستاتيستيكالىق مالىمەتتەرىن جيناپ كەلەدى. ءار جىلى ءتۇرلى دەڭگەيدەگى ادام شىعىندارىن ەسەپتەگەندە جىلىنا كەمىندە 3 مىڭ ادام اتىستان نەمەسە جارىلىستان كوز جۇماتىنى بەلگىلى بولعان.

سوڭعى ايلاردا اۋعانستاننىڭ ىشكى ديالوگى توقتاپ قالدى، وق اتىسپاۋ كەلىسىمدەرى بۇزىلىپ، ءولىم-ءجىتىم سانى ارتتى. بىراق، وسى اپتا دا تالىپتەر مەن ۇكىمەت اراسىندا كەلىسسوز قايتا باستالعانى بەلگىلى بولدى.

“The Qazaq Times”