دەمالىس كۇندەرى قىتايدىڭ بومبالاۋشى جانە شابۋىلشى ۇشاقتارى وڭتۇستىك قىتاي تەڭىزىندەگى تايۋان باقىلاۋىنداعى ارالداردىڭ كەڭىستىگىندە ۇشتى. جاۋاپ رەتىندە تايۋان تارابى دا ەكى كۇن قاتارىنان جويعىش ۇشاقتارىن كەڭىستىككە كوتەردى. قىتايدىڭ تايۋان اۋە قورعانىس كۇشتەرىنە قىسىم تۇسىرگەن ارەكەتى بىلتىر كۇزدەن بەرى تولاسسىز جالعاسىپ كەلەدى.

تايۋان (تايۆان) ۇلتتىق قورعانىس مينيسترلىگى جاساعان رەسمي مالىمدەمەدە قىتاي اسكەري-اۋە كۇشتەرىنە تيەسىلى 8 جاۋىنگەرلىك ۇشا پەن  يادرولىق قارۋ تاسىمالداۋعا قابىلەتتى 2 H-6 بومبالاۋشى ۇشاعى جانە ءبىر سۋاستى كەمەسى  20 اقپان سەنبى كۇنى  تايۋان باقىلاۋىنداعى پراتاس (Pratas Islands) ارالدارىنىڭ ماڭىندا جاتتىعۋ وتكىزگەن. تايۋان ۇلتتىق قورعانىس مينيسترلىگى قىتاي ۇشاقتارىنا ەسكەرتۋ جاساۋ ءۇشىن قاتارىنان ەكى كۇن جويعىش ۇشاقتارىن پراتاس ارالدارىنىڭ كەڭىستىگىنە شىعارعانىن ايتقان.

تايۋان تارابى بۇعان قوسا قىتايلىق ۇشاقتاردىڭ ارەكەتىن باقىلاۋ ءۇشىن زىمىران جۇيەلەرىن دە ىسكە قوسقانىن مالىمدەدى. تايۋان ۇكىمەتىنىڭ مالىمەتىنە قاراعاندا، وڭتۇستىك قىتاي تەڭىزىندەگى جاتتىعۋعا قىتايدىڭ اسكەري-تەڭىز كۇشتەرى دە قاتىسقان، بىراق ولار تۋرالى انىق مالىمەت بەرگەن جوق.

بەيجىڭ دەمالىس كۇندەرىندەگى بۇل ارەكەتتەرىنە قاتىستى رەسمي تۇسىنىكتەمە جاساماعان. ال، اقش قورعانىس مينيسترلىگىنىڭ وكى سەنبىدەگى مالىمدەمەسىندە بەيجىڭدى تاعى ءبىر مارتە «تايۋانعا اسكەري، ديپلوماتيالىق جانە ەكونوميكالىق قىسىم جاساۋدى توقتاتۋعا»، «تايۋاننىڭ سايلانعان وكىلدەرىمەن ماعىنالى ديالوگ جۇرگىزۋگە» شاقىردى.

“The Qazaq Times”