اۋعانستان ۇكىمەتىنە قاراستى كۇشتەر قارۋلى شابۋىلداردىڭ نىساناسىنا اينالدى

قۇراما شتاتتار اۋعانستانداعى قارۋلى كۇشتەرىن شىعارىپ بولماي جاتىپ، ەلدە رەجيم كۇشتەرىنە باعىتتالعان قارۋلى شابۋىلدار جيىلەدى. وسى اپتانىڭ وزىندە وننان استام پوليتسەي جارىلىستان نەمەسە قارۋلى شابۋىلدان قازا تاپتى.

اۋعانستاننىڭ فارياب پروۆينتسياسىندا اپتانىڭ باس شەنىندە بولعان جارىلىستان 7 پوليتسيا قىزمەتكەرى كوز جۇمىپ، 4 ادام اۋىر جارالانعان بولاتىن. ءبىر كۇن بۇرىن باگرام اۋدانىندا بولعان قارۋلى شابۋىلدا 2 پوليتسەي كوز جۇمدى. اۋعانستانداعى ءتۇرلى قارۋلى توپتار اراسىندا شابۋىلدى موينىنا العاندار بولمادى.

پرەزيدەنت ترامپ كەزىندە قۇراما شتاتتاردىڭ اۋعانستانداعى رەسمي وكىلى حاليزاد كاتاردا تالىپتەرمەن بىرقاتار ماڭىزدى كەلىسسوزدەر جۇرگىزىپ، سوڭىندا اۋعانستانداعى سوعىسقا نۇكتە قوياتىن كەلىسىمگە قول جەتكىزگەندەرىن مالىمدەگەن بولاتىن. اقش پەن «تاليبان» اراسىنداعى كەلىسىم شارتى بويىنشا قۇراما شتات كۇشتەرى ەلدەن شىعارىلادى، اۋعانستان رەجيم كۇشتەرىن قولداۋعان ازداعان اسكەرلەر قالدىرادى. بۇنىڭ ەسەسىنە تالىپتەر ەلدەگى «ءال-كايدا»، «يسلام مەملەكەتى» سەكىلدى قارۋلى توپتاردىڭ ارەكەتىنە جول بەرمەۋى جانە رەجيم كۇشتەرىمەن بەيبىت كەلىسىمگە كەلۋى ءتيىس بولعان.

الايدا، اقش كۇشتەرى ەلدەن شىعارىلعانىمەن اۋعانستاندا تىنىشتىق ورناي قويمادى. ۇكىمەت پەن تالىپتەر اراسىنداعى كەلىسسوزدەر توقىراۋعا ۇشىراپ، بۇدان كەيىن تالىپتەر تارابىنان رەجيم كۇشتەرىنە دەگەن شابۋىلدار جيىلەدى.

“The Qazaq Times”