قىزمەتىنە كىرىسكەنىنە كوپ بولماعان قىرعىزستان پرەزيدەنتىنىڭ الدىندا ەلدەگى اۋىر الەۋمەتتىك-ەكونوميكالىق جاعداي، ازىق-تۇلىكتىڭ قىمباتتاۋى، بيلىك توپتارىنىڭ ورتاسىنداعى ماسەلەلەر تۇرعانى بەلگىلى. دەگەنمەن، سادىر جاپاروۆقا سالماق تۇسىرەتىن ەلدىك ماسەلەلەر بۇل عانا ەمەس. اتالعاندارعا قوسا، كورشىلەس وزبەكستان، تاجىكستان ەلدەرىمەن بولاتىن شەكارا ماسەلەسىن شەشۋى ءتيىس.

شەكارا ماسەلەسى قىرعىز بيلىگىنىڭ باسىن كوپ جىلدان بەرى قاتىرىپ كەلەدى. كەڭەس داۋىرىنەن بەرى شەشىمىن تاپپاي كەلە جاتقان شەكارا تاقىرىبى اقىر سوڭىندا سادىر جاپاروۆتىڭ الدىنان شىعىپ وتىر. بىلتىر عانا قىرعىز بەن تاجىك اراسىندا شەكارا جانجالى ۋشىعىپ، قاقتىعىستىڭ ءسال-اق الدىندا قالدى.

بۇدان ءبىر اپتا بۇرىن باتكەندەگى اقساي اۋىلى مەن جالال-اباتتاعى كوك-سەرەك اۋىلىندا كورشى ەلدەردىڭ شەكارا بۇزعانى تۋرالى تۇرعىندار قىرعىز ۇكىمەتىنە شاعىمدانعان بولاتىن. ارتىنشا اپتا سوڭىنا قاراي ونداعان بەلسەندى ۇكىمەت ءۇيىنىڭ الدىندا شەكارا ماسەلەسىن شەشۋ جانە كورشى ەلدەرمەن كەلىسسوزدەردىڭ اشىق بولۋىن، تالاستى ماسەلەلەر تۋراسىندا ۇكىمەتتەر اراسىنداعى كەلىسىمدەردى اشىق جاريالاۋ تالاپتارى بويىنشا نارازىلىق اكتسياسىن دا ۇيىمداستىرعان. بۇل وقيعالار جاپاروۆ بيلىگىنە شەكارا ماسەلەسىنىڭ باستى كۇن تارىپتە تۇرۋ كەرەكتىگىن تاعى ءبىر رەت ەسكەرتكەندەي بولدى.

قىرعىزستان قازاقستان، قىتاي، تاجىكستان جانە وزبەكستان قاتارلى ءتورت ەلمەن شەكارالاسادى. سولاردىڭ اراسىندا وزبەكستان جانە تاجىكستانمەن شەشىلمەگەن شەكارا تاقىرىبى بار. اسىرەسە، وڭتۇستىكتە باتكەن وبلىسى شەكارا جانجالىنىڭ وشاعى دەۋگە بولادى. ۇلكەن جاقتان قىرعىزستان تەرريتورياسى بولعانىمەن، قىرعىز شەكاراسىنىڭ ىشىندە قالىپ كەتگەن وزبەك پەن تاجىك اۋىلدارى، شەكارا ىشىندەگى شەكارا سىزىقتارى بار.

وزبەكستان پرەزيدەنتى شاۆكات ميرزەەۆ بيلىككە كەلگەننەن كەيىن قىرعىز بەن وزبەك اعايىنداردىڭ اراسىنداعى شەكارا ماسەلەسى بۇرىنعىداي ەمەس كەلىسىمگە قاراي بەت بۇردى. وزبەك پرەزيدەنتى ءوزىنىڭ العاشقى بىشكەك ساپارىندا شەكارا ماسەلەسىندە كەلىسىمدى باستى ورىنعا قوياتىنىن كورسەتىپ كەتگەن. جاقىندا الماتىدا وتكەن ەۋرازيا ۇكىمەتارالىق كەڭەسىنىڭ جينالىسىندا وزبەك ۇكىمەت وكىلدەرى مەن قىرعىزدىڭ جاڭا بيلىك وكىلدەرى كەزدەسىپ شەكارا ماسەلەسىن تالقىلادى. وزبەكستان مەن قىرعىزستان پرەمەر-مينيسترلەرى اراسىنداعى كەزدەسۋدە ەكى ەل اراسىندا ءالى شەشىم تاپپاعان شەكارا سىزىقتارىن قۇقىقتىق جاقتان بىرىزدىلىككە كەلتىرۋ بويىنشا تالقى جۇرگەن. بۇل تۋرالى قىرعىز ۇكىمەتىنىڭ رەسمي سايتى دا حابارلاعان ەدى. بۇلار ماسەلەلەردىڭ اۋىرلىعىنا قاراماستان وزبەك پەن قىرعىز اراسىندا شەكارا داۋى شەشىم تابار ما دەگەن ءۇمىتتى جاقىنداتقانداي.

ال، قىرعىزستاننىڭ تاجىكستانمەن شەكارا ماسەلەسى ءالى العا جىلجىماي تۇر. باتكەن وبلىسىندا ءار جىلى جاز كەلىسىمەن قىرعىز-تاجىك اراسىندا جانجال باستالادى. ءتىپتى، بۇل ايماقتاعى شەكارا داۋىن شەشۋ جىل وتكەن سايىن قيىنداي تۇسۋدە. بىلتىر عانا باتكەندەگى شەكارا داۋىندا وق اتىلدى. شەكارالاس اۋىلدار تاس لاقتىرىسىپ، سويىل سىلتەسكەنى دە بار. بىلتىر ءبىر جىلدىڭ وزىندە وننان استام ءتۇرلى دەڭگەيدەگى قاقتىعىس بولعان.

قىرعىزدىڭ جاڭا ليدەرى جاپاروۆ پرەزيدەنتتىك ۇكىمەتكەر كەزىندە دە، انت بەرۋ كەزىندە دە شەكارا ماسەلەسى تۋرالى ءسوز قوزعاعان ەمەس. بىراق، پرەزيدەنت قىزمەتىن اتقارۋشى بولىپ تۇرعاندا باتكەن وبلىسىنا ارنايى ساپارمەن بارعانى، شەكارا وتىرعان جۇرتپەن كەزدەسكەنى بار. قالاي بولماسىن، جاپاروۆ ءوزى ايتقانداي قىرعىز رەسپۋبليكاسىن ەكونوميكالىق، ساياسي داعدارىستان الىپ شىعىپ، ەلدى دامۋ جولىنا سالۋ ءۇشىن دە باستى ماسەلەنىڭ ءبىرى شەكارا داۋى بولىپ قالماق.

“The Qazaq Times”