اسكەري توڭكەرىس: ميانما كوشەلەرىنە تانكتەر كىرگىزىلدى

ميانمادا نارازىلىق شەرۋلەرىنىڭ جالعاسۋىنا بايلانىستى اسكەريلەر ەلدىڭ ءىرى قالالارىنا تانكتەر كىرگىزدى. The Guardian مالىمەتىنشە، ەل اۋماعىندا عالامتور وشىرىلگەن.

قازىر ميانمادا اسكەريلەردىڭ بيلىكتى باسىپ الۋىنا قارسى بەيبىت اكتسيالار وتكىزىلىپ جاتىر. يانگون قالاسىنداعى ورتالىق بانك قىزمەتكەرلەرى اسكەريلەرگە قارسى ازاماتتىق باعىنباۋ قوزعالىسىنا قوسىلعان.

1 اقپاندا ميانما اسكەريلەرى ەلدە توڭكەرىس جاساپ، بيلىكتەگى اۋنگ سان سۋ چجي مەن بىرنەشە ساياساتكەردى ۇيقاماققا العان. اسكەريلەر بىلتىر قاراشادا وتكەن پارلامەنت سايلاۋىنىڭ ناتيجەسىمەن كەلىسپەگەن ەدى. بىلتىرعى سايلاۋدا اۋنگ سان سۋ چجي باسقاراتىن دەموكراتياشىلاردىڭ ۇلتتىق ليگاسى پارتياسى جەڭىمپاز دەپ تانىلعان. اسكەريلەر سايلاۋ ءادىل وتپەدى دەپ سانايدى. توڭكەرىس جاساعاندار ەلدە ءبىر جىل توتەنشە جاعداي جاريالاپ، بيلىك اسكەر باسشىسى مين اۋنگ حلايننىڭ قولىنا ءوتتى. اسكەري توڭكەرىسكە قارسى شىققانداردىڭ اراسىندا مۇعالىمدەر، زاڭگەرلەر، بانك قىزمەتكەرلەرى جانە مەملەكەتتىك قىزمەتكەرلەر، دارىگەرلەر بار.

2017 جىلعا دەيىن ميانمانىڭ راكحاين شتاتىندا ءبىر ميلليون روحيندجا مۇسىلماندارى ءومىر سۇرگەن. بىراق حالقىنىڭ باسىم بولىگى بۋددا ءدىنىن ۇستاناتىن ميانما ولاردى زاڭسىز يمميگرانتتار دەپ، ازاماتتىق بەرۋدەن باس تارتقان. روحيندجالار ۇزاق جىلدار بويى قىسىم كورىپ كەلە جاتقاندارىنا بىرنەشە رەت شاعىمدانعان.

2017 جىلى روحيندجا اسكەريلەرى راكحاين شتاتىندا بىرنەشە شابۋىل ۇيىمداستىرعان. سول جىلى ميانمانىڭ راكحاين شتاتىندا اسكەريلەر يسلام ءدىنىن ۇستاناتىن مىڭداعان روحيندجانى ولتىرگەن. ايماقتان 700 مىڭنان استام روحيندجا ميانمامەن كورشىلەس جاتقان بانگلادەشكە قاشقان. ەل بيلىگى راكحاينداعى اسكەريلەردىڭ ارەكەتىن «ەل تاۋەلسىزدىگىنە قاۋىپ توندىرەتىن ەكسترەميستەرمەن كۇرەس» دەپ اتادى. ميانمانىڭ بۇل ارەكەتى بەيبىتشىلىك سالاسى بويىنشا نوبەل سىيلىعىن العان اۋن سان سۋ ءچجيدىڭ دە بەدەلىنە نۇقسان كەلتىردى.

"The Qazaq Times"