AsiaCredit Bank-ءتىڭ بانكتىك جانە وزگە دە وپەراتسيالاردى جانە باعالى قاعازدار نارىعىنداعى قىزمەتتى جۇرگىزۋگە ارنالعان ليتسەنزياسىنان ايىرىلدى. بۇل تۋرالى قارجى نارىعىن رەتتەۋ جانە دامىتۋ اگەنتتىگى حابارلادى.

بانك پرۋدەنتسيالدىق نورماتيۆتەردى جانە ساقتالۋعا مىندەتتى باسقا دا نورمالار مەن ليميتتەردى جۇيەلى تۇردە بۇزۋ; ارنايى بەكىتىلگەن شارالاردى ورىنداماۋ; قوسىمشا كاپيتالداندىرۋ جونىندەگى ۋاكىلەتتى ورگاننىڭ تالاپتارىن ورىندامادى دەگەن ايىپتار تاعىلعان.

قازىر بانككە ۋاقىتشا اكىمشىلىك تاعايىندالىپ، وعان بارلىق باسقارۋ ورگاندارىنىڭ وكىلەتتىكتەرى ءوتتى. ۋاقىتشا اكىمشىلىكتىڭ باسشىسى رەتىندە قارجى نارىعىن رەتتەۋ اگەنتتىگىنىڭ قىزمەتكەرى ەرلان سارسەنبەكۇلى تاعايىندالدى.

12 اقپاننان باستاپ AsiaCredit Bank-ءتىڭ بارلىق وپەراتسيالارى توقتاتىلدى. رەسمي حابارلامادا: «بانكتىڭ قارجىلىق جاعدايىن جاقسارتۋ جونىندەگى ءىس-شارالار جوسپارىنىڭ مەرزىمى 2020 جىلى 25 جەلتوقساندا اياقتالدى. بانك پەن ونىڭ اكتسيونەرى قابىلداعان شارالار بانكتىڭ قارجىلىق جاعدايىن تۇراقتاندىرعان جوق. بانك پرۋدەنتسيالدىق نورماتيۆتەردى بۇزدى جانە بانك كليەنتتەرى الدىنداعى تولەمدەر مەن اۋدارىمدار بويىنشا مىندەتتەمەلەردى ورىندامادى. بانكتىڭ قوسىمشا پروۆيزيالارىن قالىپتاستىرۋ ءۇشىن قاجەتتى مەنشىكتى كاپيتالدىڭ تاپشىلىعى 19 ملرد تەڭگە»، – دەلىنگەن.

AsiaCredit Bank ءوتىمدى اكتيۆتەرىنىڭ مولشەرى 75 ملن تەڭگە، بۇل رەتتە ورىندالماعان كليەنتتىك تولەمدەردىڭ مولشەرى 8 ملرد تەڭگەدەن اسادى.

1 اقپانداعى جاعداي بويىنشا AsiaCredit Bank-تە جيىنتىق قالدىعى شامامەن 19 ملرد تەڭگە بولاتىن 23 174 جەكە تۇلعانىڭ دەپوزيتتەر بار. سالىمشىلاردىڭ، بانكتىڭ جەكە تۇلعالارىنىڭ 97,7% دەپوزيتتەرى «قازاقستاننىڭ دەپوزيتتەرگە كەپىلدىك بەرۋ قورى» اق كەپىلدىگىمەن تولىق كولەمدە جابىلادى.

2019 جىلدىڭ شىلدەسىنەن باستاپ بانك بيزنەسمەن وريفدجون شوديەۆكە ءوتتى. كاسىپكەرگە «Capital Bank» تە تيەسىلى. قارجى ينستيتۋتتارى بىرىكپەك بولدى، بىراق بۇل جوسپارلار ورىندالمادى.

"The Qazaq Times"