نارازى حالىق اۋن سان سۋ ءچيدىڭ بوساتىلۋىن تالاپ ەتۋدە. فوتو: BBC

ميانمانىڭ بيلىگىن اسكەريلەر باسىپ الىپ، ەلدە ءبىر جىلعا اسكەري جاعداي جاريالاعانىمەن ءىرى قالالاردا اسكەريلەرگە قارسى نارازىلىق شارالارى وتۋدە. قاتارىنان بەس كۇنگە جالعاسقان نارازىلىق شارالارىندا ازاماتتار اسكەريلەردىڭ بيلىكتى بوساتىپ، ەل حالقىنىڭ تاڭداۋىنا قۇرمەت ەتۋگە، ازاماتتىق بيلىكتى قايتا قالپىنا كەلتىرۋدى تالاپ ەتۋدە. كەيبىر قالالاردا تۇرعىندار قاماۋداعى بۇرىنعى ەل جەتەكشىسى اۋن سان سۋ چيدى بوساتۋدى تالاپ ەتىپ جاتىر.

اسكەري بيلىك ەلدە كومەندانتتىق ساعات جاريالاپ، توپتاسۋعا قاتاڭ شەكتەۋ قويعانىمەن، ورتالىق قالا مەن يانگونا، ماندالاي قاتارلى ءىرى قالالارداعى نارازىلىق شارالارىن توقتاتا المادى. ەكى كۇن بۇرىن ميانما قارۋلى كۇشتەرى نارازى توپقا قاتاڭ جاۋاپ قايتاراتىنىن بىلدىرگەن. دەمونسترانتتارعا سۋ شاشىپ، رەزينكە وق اتتى.

BBC حابارىنا قاراعاندا كەي قالالاردا كىسى ءولىمى بولۋى دا مۇمكىن. بىراق، اسكەريلەردىڭ قارۋلى كۇش قولدانعانى تۋرالى مالىمەتتەر راستالماعان. دۇيسەنبى كۇنگى نارازىلىق شاراسىندا جاراقات العان ازاماتتى قاراعان دارىگەر Human Rights Watch ۇيىمىنا بەرگەن جاۋابىندا: «بۇنداي جاراقات اتىس قۇرالىنان اتىلعانى بەلگىلى بولىپ تۇر»، – دەگەن.

حالىققا وق اتىلعانى تۋرالى مالىمەتتەردى اسكەري بيلىك جوققا شىعارۋدا. ولار كەيدە ەسكەرتۋ رەتىندە اسپانعا وق اتىلاتىنىن عانا ايتادى. دەگەنمەن، نارازى توپتى تاراتۋ ءۇشىن جاساۋراتقىش پەن رەزينكە وق پايدالانعانى تۋرالى رەسمي مالىمەتتەردە راستادى.

ميانمادا 1 اقپان كۇنى اسكەري توڭكەرىس بولىپ، ەل پرەزيدەنتى اۋن سان سۋ چي مەن بيلىك پارتياسىنىڭ جەتەكشىلەرى قاماۋعا الىنعان بولاتىن. اقش، جاپونيا قاتارلى كوپتەگەن ەلدەر ميانماداعى اسكەري توڭكەرىستى ايىپتاپ مالىمدەمە جاسادى. تاۋەلسىز ساراپشىلار توڭكەرىستىڭ ارتىندا مەكونگ ايماعىنا ىقپالىن جۇرگىزگىسى كەلەتىن دەرجاۆالاردىڭ تۇرعانىن ايتادى.

“The Qazaq Times”