الداعى ون جىلدىقتاردىڭ تەندەنتسياسى: دانيا جاسىل ەنەرگيا ءۇشىن جاساندى ارال سالۋدا

كليمات داعدارىسى مەن ەكنەرگيا داعدارىسى تاياۋ ون جىلدىقتاردىڭ باستى ماسەلەسىنە اينالعانىن حالىقارالىق قاۋىمداستىق ەسكەرتۋدە. ەنەرگيا قاينارلارىنا دەگەن قاجەتتىلىكتىڭ ارتۋىنا ىلەسە كليمات داعدارىسى دا ارتا تۇسۋدە. قازىر دامىعان ەلدەر پارنيكتىك گاز شىعارىندىلارىنان ازايتۋ مەن كومىرتەكتەن ءبىرجولا قۇتىلۋدىڭ جولدارىن قاراستىرۋدا.

بۇعان دەيىن بريتانيانىڭ وسى باعىتتا ءىرى قادامدار جاساعانىنا كۋا بولعانبىز. ەندى دانيا ۇكىمەتى سولتۇستىك تەڭىزدە ءوز ەلىنە جانە بلگيا، نيدەرلاند پەن گەرمانياعا ەلەكتر ەنەرگياسىن بەرەتىن جانە قورشاعان ورتاعا زيانى جوق جاساندى ارال جوباسىن باستادى.

18 فۋتبول الاڭىنداي بولاتىن جاساندى ارال تولىقتاي جەل جانە كۇن ەنەرگياسىنان پايدالانىپ ەلەكتر قۋاتىن وندىرەدى. العاشقى جوبانىڭ قۇنى 34 ملرد اقش دوللارىنا باعالانعان. جاعالاۋدان 80 شاقىرىم قاشىقتىققا سالىناتىن ارالدىڭ كولەمىن بولاشاقتا ەكى ەسە ۇلكەيتۋ دە كوزدەلگەن.

دانيا ۇكىمەتى بۇنى ەل تاريحىنداعى ەڭ ۇلكەن قۇرىلىس جوباسى دەپ تانىستىرعان. سولتۇستىك تەڭىزدەگى تولاسسىز جەل ەنەرگياسى مەن كۇن نۇرىنان جاسىل ەنەرگيا وندىرەتىن جوبانىڭ قۇرىلىسى 2034 جىلى پايدالانۋعا بەرىلەدى. وسىلايشا، دانيا كومىرتەكتىڭ اۋاعا ءبولىنۋىن 1990 جىلداعىمەن سالىستىرعاندا 70 پايىزعا ازايتۋ تۋرالى ۋادەسىن ورىنداماق.

باتىس ەلدەرىنىڭ بۇل قادامدارى بولاشاق دامۋ كريتەريى مەن جاھاندىق باستى تەندەنتسيا بولاتىنىن كورسەتەدى.

“The Qazaq Times”