اقتوبەدەگى ەرەۋىل: مۇنايشىلار اشتىق جاريالادى

اقتوبە وبلىسىنىڭ كوكجيدە كەنىشىندەگى مۇنايشىلار ەرەۋىلى ناتيجە بەرمەگەندىكتەن، نارازىلار اشتىق جاريالادى. جۇمىسشىلار باسشىلىققا قويعان تالاپتارى ورىندالمايىنشا، ەرەۋىلدى توقتاتپايمىز دەديدى.

بۇعان دەيىن ولار جالاقى ماسەلەسىن شەشۋگە كومەكتەسىڭىز دەپ  وبلىس اكىمدىگىنە دە بىرنەشە رەت حابارلاسقان. بىراق اكىمدىك بۇل ماسەلەگە بەي-جاي قاراعان سىڭايلى.

مۇنايشىلاردىڭ  قىتايلىق  «كمك مۇناي» كومپانياسىنا قويعان ءتورت تالاپتارى بار.  ءبىرىنشىسى –جالاقىلارىن ءجۇز پايىزعا ءوسىرۋ. ەكىنشىسى – جاتاتىن جەرلەرىن كەنىشتەن الىستاۋ جەرگە كوشىرىپ، اسحاناداعى اس ءمازىرىن جاقسارتۋ. ءۇشىنشىسى – كاسىپوداق جۇمىسى، ال سوڭعىسى- باسشىلىقتان كورەتىن قىسىمدى توقتاتۋ. مۇنايشىلار ازىرگە باسشىلىقپەن قانداي دا ءبىر كەلىسىمگە كەلمەگەندەرىن ايتادى. تەك بۇگىن تاڭەرتەڭ كومپانيا پرەزيدەنتى ۆان تسزينباو مۇنايشىلاردىڭ جالاقىسىن ءجۇز ەمەس، تەك 20 %-عا عانا كوتەرە الاتىندىعىن  ايتقان. الايدا بۇل ۇسىنىسقا جۇمىسشىلار كەلىسپەدى.

«كمك مۇناي» – اقتوبە وبلىسىنداعى كەنىشتەرگە يەلىك ەتەتىن قىتايلىق ءىرى مۇناي ءوندىرۋشى «سنپس اقتوبەمۇنايبەن» ەنشىلەس كومپانيا. 400-گە جۋىق ادام ەڭبەك ەتەتىن كومپانيا 2004 جىلى قۇرىلعان. اقتوبە وبلىسىنداعى كوكجيدە، قۇمساي كەنىشتەرىندە مۇناي وندىرەدى.

قازىر اتالعان ماسەلەنى رەتتەۋ بويىنشا كەلىسسوزدەر باستالعان. ەڭبەك ۇجىمىمەن كەزدەسۋ بارىسىندا كوميسسيا مۇشەلەرى قر زاڭناماسىنىڭ نورمالارىن ءتۇسىندىرىپ، قازىرگى ۋاقىتتا جالاقىنى كوتەرۋ ماسەلەسى كومپانيانىڭ قۇرىلتايشىلارىمەن جانە ديرەكتورلار كەڭەسىنىڭ مۇشەلەرىمەن كەلىسىلەتىنىن جەتكىزدى.

"The Qazaq Times"