دەمالىس كۇندەرى قىتايدىڭ 12 اسكەري ۇشاعى تايۋان (تايۆان) كەڭىستىگىنە كىرىپ، تايۋاننىڭ اۋە قورعانىس كۇشتەرىن ابىگەرگە سالدى. سەنبى كۇنى اقش مەملەكەتتىك دەپارتامەنتى تايۋانعا اسكەري، ديپلوماتيالىق جانە ەكونوميكالىق قىسىم ءتۇسىرىپ وتىر دەپ قىتايدى ايىپتادى. سونداي-اق، تايۋاندى «تاباندى بولۋعا» شاقىردى.

اقش مەملەكەتتىك دەپارتامەنتى جاريالاعان جازباشا مالىمدەمەدە قىتايدىڭ تايۋاندى قامتىعان كورشى ەلدەرگە قىسىم كورسەتۋ ارەكەتىنە الاڭداۋشىلىق بىلدىرگەن. «ءبىز قىتايدى تايۋانعا باعىتتاعان اسكەري، ديپلوماتيالىق جانە ەكونوميكالىق قىسىمدارىن توقتاتىپ، تايۋان حالقى سايلاعان ۇكىمەت جەتەكشىلەرىمەن ماعىنالى ديالوگ ورناتۋعا شاقىرامىز»، – دەلىنگەن مەم. دەپارتامەنت مالىمدەمەسىندە.

سوڭعى كەزدەرى قىتايدىڭ تايۋانعا باعىتتالعان اسكەري قىسىمى جيىلەي ءتۇستى. تايۋان بۇعازىنداعى اسكەري قيمىلداردىڭ جيىلىگى ارتتى. بىرنەشە ايدان بەرى قىتايدىڭ اۋە كۇشتەرى تايۋان بۇعازىنا جانە پلاتاس ارالدارىنا كۇن سايىن كىرىپ، تايۋان اۋە قورعانىس كۇشتەرىنە قىسىم كورسەتەدى. تايۆاننىڭ ۇلتتىق قورعانىس مينيسترلىگى سەنبىدە (23 قاڭتاردا) قىتاي حالىق-ازاتتىق ارمياسى تايۋان بۇعازىنىڭ وڭتۇستىك-باتىسىنداعى الدىن الۋ جانە باقىلاۋ يدەنتيفيكاتسيالىق ايماعىنا باسىپ كىرۋ ءۇشىن سەگىز H-6K بومبالاۋشى جانە ءتورت J-16 رەاكتيۆتى جويعىشتارىن جىبەردى دەپ حابارلادى. بۇل جىل باسىنان بەرى قىتايدىڭ تايۋانعا ءبىر مەزەتتە ەڭ كوپ سوعىس ۇشاعىن جىبەرۋى. تايۋان ۇلتتىق قورعانىس مينيسترلىگى مالىمدەمەسىندە 2020 جىلدىڭ وزىنەد قىتاي ۇشاقتارىنىڭ تايۋان كەڭىستىگىنە كىرۋى 380 رەت قايتالانعان.

اقش ءوزىنىڭ ءۇندى-تىنىق مۇحيتىنداعى وداقتاستارى مەن مۇددەسىن قورعاۋ ءۇشىن ستراتەگياسىن تاباندى جۇرگىزەتىنىن، بۇل باعىتتا دەموكراتيالى تايۋانمەن قارىم-قاتىناستى بارعان سايىن تەرەڭدەتە تۇسەتىنىن جەتكىزگەن. ايتالىق، اقش-تىڭ جاڭا بيلىگى بەيجىڭدى تايۋان بۇعازى ماسەلەسىن بەيبىت جولمەن شەشىپ، تايۋان حالقىنىڭ ەركىندىگى مەن تالاپ-تىلەگىنە قۇرمەت ەتۋگە شاقىرعان.

“The Qazaq Times”