سولتۇستىك كورەيانىڭ ليدەرى كيم جوڭ ۋننىڭ (Kim Jong Un) تۋعان كۇنىنە وراي پيوڭياڭ (پحەنيان) جاڭا، زاماناۋي وزىق قارۋلاردى جاساۋعا ارەكەت ەتىپ جاتقاندارىن حابارلادى.  مالىمدەمەدە ايتىلۋىنشا، سولتۇستىك كورەيا جوعارى دالدىكتەگى بالليستيكالىق زىمىران، بارلاۋشى سپۋتينك، يادرولىق قارۋ تيەلگەن كەمەلەر جانە الىستان مەڭگەرىلەتىن ۇشاقتاردى دامىتىپ جاتقانى ايتىلعان.

ساراپشىلاردىڭ ايتۋىنشا، كحدر ليدەرى جايدان-جاي وزىق قارۋلار تۋرالى مالىمدەمە جاساپ جاتقان جوق. ول ءبىر اپتادان كەيىن اقش پرەزيدەنتى رەتىندە قىزمەتكە كىرىسكەلى جاتقان جوزەف بايدەنگە قاراتا ەسكەرتۋ جاساۋدا. بىلايشا ايتقاندا، كيم جوڭ ۋننىڭ ايتقىسى كەلگەنى: اق ءۇيدىڭ جاڭا اكىمشىلىگى سولتۇستىك كورەيامەن مامىلەگە كەلمەسە، پيوڭياڭ اسكەري قۋاتىن ۋاشينگتون مەن سەۋل ويلاپ كورمەگەن دەڭگەيگە دەيىن كوتەرەتىنىن ەسكەرتىپ وتىر.

تاۋەلسىز ساراپشىلاردىڭ بولجاۋىنشا، سولتۇستىك كورەيا ليدەرى بۇل مالىمدەمە ارقىلى بايدەن ۇكىمەتىن ديالوگقا شاقىرىپ جاتىر دەپ ۇعۋعا دا بولادى. سەبەبى، اقش پرەزيدەنتى ترامپ سولتۇستىك كورەيا باسشىسى كيم جوڭ ۋنمەن ءۇش رەت كەزدەسكەنىمەن تاراپتار اراسىندا كەلىسىم جۇزەگە اسپادى. ال، قۇراما شتاتتاردىڭ ەكونوميكالىق سانكتسياسىنداعى سولتۇستىك كورەيانىڭ ەكونوميكاسى تەرەڭ داعدارىسقا باتتى. كيم جوڭ ۋن ءوزىنىڭ يادرولىق قارۋىنا يە اسكەري قۋاتىن كەلىسىمگە ءساتتى ايىرباستاعىسى كەلەدى.

بايدەن ۇكىمەتىندە لاۋازىمعا يە بولۋى مۇمكىن ساياساتكەرلەردىڭ بۇعان دەيىنگى سولتۇستىك كورەياعا قاراتقان ۇستانىمدارىنا تالداۋ جاساي وتىرىپ، بايدەن بيلىگى سولتۇستىك كورەيامەن كەلىسىم جاساۋ مۇمكىندىگى بار دەپ بولجايدى BBC ارناۋلى حابارىندا. دەمەك، ديالوگتار قايتا جاندانىپ جاتسا، سولتۇستىك كورەيا ءبىر عانا يادرولىق قارۋ عانا ەمەس، زاماناۋي قارۋلاردى دا كەلىسسوز ۇستەلىنە قويىپ، ءوز سالماعىن ارتتىرعىسى كەلەدى.

“The Qazaq Times”