ناتو قۇرامىنداعى بىرقاتار ەۋروپا ەلدەرىنىڭ 2021 جىلى ءۇندى-تىنىق مۇحيتىنا اسكەري كۇشتەرىن ورنالاستىرۋدى جوسپارلاپ جاتقانىن بۇعان دەيىن دە سايتىمىزدا بىرنەشە مارتە جازىپ ەدىك. بۇل ارەكەتتەردىڭ سەبەبى مەن سالدارى تۋرالى ساراپشىلار پىكىرلەرىندە ۇسىنعان ەدىك. جيناقتاي ايتقاندا، بۇل قىتايدىڭ اتالعان ەكى مۇحيتتاعى اسكەري كەڭەيۋىن توقتاتىپ، وڭىردەگى ىقپالىنا، ارەكەتتەرىنە شەكتەۋ قويادى.

بۇدان ءبىراز ۋاقىت بۇرىن Sydney Morning Herald باسىلىمىنا بەرگەن سۇحباتىندا گەرمانيانىڭ قورعانىس ءمينيسترى اننەگرەت كرامپ-كاررەنباۋەر: «گەرمانيا 2021 جىلدان باستاپ ءۇندى-تىنىق مۇحيتىن بارلاۋعا اسكەري كەمەلەرىن اتتاندىرادى»، – دەگەن بولاتىن. ول بۇعان قوسا وسى اتالعان مۇحيتتارداعى تەرريتوريالىق داۋلار مەن قىتايدىڭ قاۋىپتى امبيتسيالارى تەك كوپجاقتى قاتىسۋلار ارقىلى شەشىم تاباتىنىنا سەنىم بىلدىرگەن ەدى.

جاپوننىڭ «كيودو» اقپارات اگەنتتىگى دە جاپونيا قورعانىس مينيسترلىگى تاراتقان مالىمدەمەگە سىلتەمە جاساي وتىرىپ، ەلدىڭ ءوزىن قورعاۋ كۇشتەرى گەرمانيا تەڭىز كۇشتەرىمەن وڭتۇستىك قىتاي تەڭىزىندە بىرىككەن اسكەري وقۋ-جاتتىعۋىن وتكىزۋى مۇمكىن ەكەنىن حابارلاعان. جاپون قورعانىس ءۋازىرى ء(مينيسترى) نوبۋو كيشي: «ءۇندى-تىنىق مۇحيتىندا بولعان وقيعالار گەرمانيا مەن ەۋروپاعا دا اسەر ەتەدى. سوندىقتان ءبىر ءۇندى-تىنىق مۇحيتى ايماعىندا ەرەجەگە نەگىزدەلگەن ءتارتىپتى ساقتاۋ ءۇشىن ىنتىماقتاستىققا دايىنبىز»، – دەگەن.

سوڭعى جىلدارى، اسىرەسە قىتاي بيلىگىنە شي جينپيڭ (سي تسزينپين) كەلگەلى بەرى، قىتاي حالىق-ازاتتىق ارمياسىنا تريلليونداعان يۋان ينۆەستيتسيا سالىپ، تەڭىز، اۋە كۇشتەرىنىڭ قۋاتىن ەسەلەپ ارتتىردى. اسىرەسە، وڭتۇستىك قىتاي تەڭىزى مەن ءۇندى مۇحيتىنداعى كەيبىر وڭىرلەردە اسكەري مۇمكىندىكتەرىن ارتتىراتىن قادامدارىن جيىلەتتى. بۇل قىتايدىڭ تەڭىزدە باتىس دەرجاۆالارىمەن باسەكەلەسۋگە دايىن، ءتىپتى كەيبىر وڭىرلەردە سوعىس قۋاتى جاعىنان ولاردان اسىپ تۇسۋگە تىرىسىپ جاتقانىن كورسەتتى.

باتىس ەلدەرى ارينە بۇنى كورمەي قالعان جوق. ناتو مۇشەلەرى بىلتىر قاراشاداعى سامميتتتە قىتايدىڭ باستى ستراتەگيالىق قارسىلاس قاتارىندا تانىدى. وسىدان كەيىن ناتو-عا مۇشە ەۋروپا ەلدەرى قىتايدىڭ اسكەري قيمىلدارى مەن مۇمكىندىكتەرى ارتا تۇسكەن ءۇندى-تىنىق مۇحيتى ايماعىنا اسكەري كۇشتەرىن جونەلتۋگە كىرىستى. بۇعان دەيىن بريتانيا ءوزىنىڭ قۋاتتى تەڭىز قوسىندارىنىڭ ءبىرىن جىبەرىپ، جاپونيا، اۋستراليا جانە اقش-پەن تىنىق مۇحيتىنىڭ باتىس جاعالاۋىندا اسكەري جاتتىعۋ وتكىزەتىنىن بىلدىرگەن. دەمەك، بۇل قىتايدىڭ شىعىسى مەن وڭتۇستىگىندەگى تەڭىزدەگى قادامدارىن تەجەپ، ىپقپالىن السىرەتە تۇسپەك. الايدا، ونىڭ اسەرى ونىڭ قۇرلىقتاعى شەكاراسىنا ءوز اسەرىن تينگىزبەي قالمايدى.

“The Qazaq Times”