بەلارۋس بيلىگى تيحانوۆسكاياعا قارسى قىلمىستىق ءىس قوزعادى

بەلارۋس باس پروكۋراتۋراسى سۆەتلانا تيحانوۆسكاياعا جانە وپپوزيتسيانىڭ ۇيلەستىرۋ كەڭەسىنىڭ مۇشەلەرىنە قاتىستى «ەكسترەميستىك قۇرىلىم جانە ونى باسقارۋ فاكتىسى بويىنشا» قىلمىستىق ءىس قوزعادى. بۇل تۋرالى ۆەدومستۆو ءوزىنىڭ Telegram كانالىندا حابارلادى.

حابارلامادا: «باس پروكۋراتۋرا قىلمىستىق كودەكستىڭ 36-بابىنىڭ 3-بولىگى بويىنشا ۇيلەستىرۋ كەڭەسىنىڭ مۇشەلەرىنە قاتىستى قىلمىستىق ءىستى تەرگەۋ بارىسىندا الىنعان دەرەكتەردى ەسكەرە وتىرىپ سۆەتلانا تيحانوۆسكايا، كولەسنيكوۆا، لاتۋشكو، كوۆالكوۆا، دىلەۆسكيگە جانە باسقا ادامدارعا قاتىستى ەكسترەميستىك قۇرىلىمدى قۇرۋ جانە وعان باسشىلىق ەتۋ فاكتىسى بويىنشا قىلمىستىق ءىس قوزعاۋ تۋرالى شەشىم قابىلدادى»، – دەلىنگەن. سونىمەن قاتار، باس پروكۋراتۋرانىڭ تاپسىرماسى بويىنشا تەرگەۋ كوميتەتى ۇيلەستىرۋ كەڭەسىنىڭ مۇشەلەرىنە قىلمىستىق كودەكستىڭ 357-بابىنىڭ 1-بولىگى بويىنشا قىلمىستىق ءىس قوزعادى («مەملەكەتتىك بيلىكتى كونستيتۋتسيالىق ەمەس جولمەن باسىپ الۋ ءۇشىن جاسالعان قاستاندىق»).

جوعارىدا اتالعان بەلسەندىلەردەن بولەك، باس پروكۋراتۋرا بىرقاتار باسقا ازاماتتارعا قىلمىستىق كودەكستىڭ 361-2-بابى بويىنشا ەكسترەميستىك قۇرىلىمنىڭ قىزمەتىن قارجىلاندىرۋعا بايلانىستى ءىس قوزعادى. ۆەدومستۆو بەلارۋس ازاماتتارى، ازاماتتىعى جوق ادامدار، شەتەلدىك ازاماتتار، ونىڭ ىشىندە لاۋازىمدى تۇلعالار تاراپىنان ەكسترەميزم فاكتىسىنە قۇقىقتىق باعا بەرىلەتىنىن اتاپ ءوتتى.

ۇيلەستىرۋ كەڭەسىنىڭ قۇرىلۋىنا 14 تامىزدا بەلارۋس پرەزيدەنتتىگىنە كانديدات سۆەتلانا تيحانوۆسكايا باستاماشى بولدى. 9 تامىزدا وتكەن پرەزيدەنت سايلاۋىندا وسك الەكساندر لۋكاشەنكو 80,01% داۋىسپەن جەڭىسكە جەتكەنىن جاريالادى. بەلارۋس وپپوزيتسياسى سايلاۋ قورىتىندىسىن مويىنداۋدان باس تارتىپ، ەلدە ءىرى شەرۋلەر باستالدى.

بىرىككەن وپپوزيتسيا كەڭەسىنىڭ قۇرامىندا 70 ادام بار. ۇيلەستىرۋ كەڭەسى جەتى ادامنان تۇراتىن پرەزيديۋمدى سايلادى. كەڭەستىڭ مىندەتى – جۇيەنى وزگەرتۋ.

"The Qazaq Times"