فوتو: www.inform.kz

الەم بويىنشا سىناقتان ءساتتى وتكەن Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسىن سالۋدى باستاعان ەلدەر قاتارىندا ۇلىبريتانيا، اقش جانە كانادا بار. كوروناۆيرۋسقا توسقاۋىل بولۋ ماقساتىندا بۇگىن كانادادا ۆاكتسيناتسيا باستالدى.

ۆيرۋسقا قارسى ەكپەگە ءبىرىنشى بولىپ ۇلىبريتانيا بيلىگى رۇقسات بەردى. 9 جەلتوقساندا بريتانيادا Pfizer كومپانياسى وندىرگەن ۆاكتسينانى العاشقى بولىپ 90 جاستاعى مارگارەت كينان ەسىمدى بريتاندىق ايەل قابىلدادى. ەلدىڭ دەنساۋلىق ساقتاۋ ءمينيسترى مەتت حانكوكتىڭ ايتۋىنشا، ەكپەنىڭ 40 ميلليون دوزاسىنا تاپسىرىس بەرىلگەن.

12 جەلتوقساندا اقش-تىڭ قۇزىرلى ورگاندارى Pfizer جانە BioNTech كومپانيالارىنىڭ كوروناۆيرۋسقا قارسى ۆاكتسيناسىن توتەنشە جاعدايلاردا قولدانۋعا رۇقسات بەردى. پرەپاراتتى العاشقى بولىپ مەديتسينالىق قىزمەتكەرلەر مەن قارتتار الادى دەپ جوسپارلانىپ وتىر. وتكەن اپتادا ۇلىبريتانيا بيلىگى دە ۆاكتسينانى قولدانۋعا رۇقسات بەرگەن. امەريكادا اتالعان كومپانيالارىنىڭ پرەپاراتتارى ەلدىڭ 145 مەديتسينالىق ورتالىعىنا جەتكىزىلمەك.

كاناداعا 14 جەلتوقساندا جەتكىزىلگەن Pfizer, BioNTech كومپانيالارىنىڭ پرەپاراتىن العاشقى بولىپ مەديتسينا قىزمەتكەرلەرى مەن قارتتار ءۇيىنىڭ تۇرعىندارى قابىلدادى. قازىر ەلدە كوروناۆيرۋستان قازا تاپقان 13 431 تۇرعىننىڭ 60%-ى قارتتار ءۇيىنىڭ تۇرعىندارى ەكەن. شارانى جەرگىلىكتى تەلەارنالارداعى تىكەلەي ەفيردە كورسەتتى. ماماندار ەكپە ەگىلگەن تۇرعىنداردىڭ جاعدايى جاقسى ەكەنىن ايتادى.

Pfizer – BioNTech ۆاكتسيناسى دارىلىك زاتتار مەن مەديتسينالىق قۇرىلعىلاردى باقىلاۋ جونىندەگى باسقارماسىمەن (MHRA) ماقۇلدانعان. ەۋروپا كوميسسياسىنىڭ باسشىسى ۋرسۋلا فون دەر ليايەننىڭ ايتۋىنشا، ساتىپ الىنادى دەپ جوسپارلانعان 300 ملن دوزانىڭ باعاسى 4,6 ملن ەۋرو.

اتالعان ەكپەلەردەن باسقا، تاعى بىرنەشە كومپانيا ۆاكتسينالارىن تىركەۋگە جانە ونەركاسىپتىك ءوندىرىستى باستاۋعا دايىندالىپ جاتىر. بۇعان دەيىن الەمدە ەكى ۆاكتسينا كلينيكالىق سىناقتىڭ سوڭعى ءۇشىنشى فازاسىن اياقتاعان. قازىر باسقا ون ەكپە سىناقتىڭ سوڭعى كەزەڭىنەن وتكىزىلىپ جاتىر. سىناقتان ءساتتى ءوتىپ، كوروناۆيرۋستى ەمدەۋدە 90%-دان ارتىق دالدىك كورسەتكەن ۆاكتسينالار قاتارىندا Pfizer, BioNTech فارماتسەۆتيكالىق كومپانياسى جاساعان ەكپە جانە امەريكالىق مoderna ەكپەسى بار.

امەريكالىق Pfizer جانە ونىڭ گەرمانيالىق سەرىكتەسى BioNTech كومپانياسى بىرلەسىپ ازىرلەگەن ۆاكتسينانىڭ تيىمدىلىگى كلينيكالىق سىناقتا 90%-دان استام وڭ ناتيجە كورسەتكەن. ال وسكفورد ۋنيۆەرسيتەتى مەن AstraZeneca كومپانياسى وندىرگەن كوروناۆيرۋسقا قارسى ۆاكتسينا 70% تيىمدىلىك كورسەتكەن.

وشاعى قىتايدىڭ ۋحان قالاسىنان باستالعان قاۋىپتى ۆيرۋستى جۇقتىرعاندار سانى 72 ميلليوننان اسىپ كەتتى. كەيس تىركەلۋ بويىنشا انتيرەكورد ورناعان مەملەكەتتەردىڭ ۇشتىگىندە امەريكا، برازيليا، ءۇندىستان تۇر.

"The Qazaq Times"