وسى اپتا اقش-تىڭ سەناتى مەن وكىلدەر پالاتاسى 2021 قارجى جىلىنا ارنالعان ۇلتتىق قورعانىستى اۆتوريزاتسيالاۋ تۋرالى زاڭىن قابىلدادى. جاڭا زاڭ جوباسىنىڭ كوپتەگەن تارماقتارى قىتايعا قاتىستى، اسىرەسە «تىنىق مۇحيتتاعى تەجەۋ جوسپارى» ساراپشىلار ءۇشىن بارىنشا قىزىقتى تاقىرىپ بولدى. ساراپشىلاردىڭ پىكىرىنشە، جاڭا تەجەۋ جوسپارى قىتايدى قالاي بارىنشا ءتيىمدى تەجەۋگە جانە اقش-تىڭ ازياداعى قورانىس قۋاتىن ارتتىرۋعا مۇمكىندىك بەرەدى.

تىنىق مۇحيتىندا قىتايدى تەجەۋگە مۇمكىندىك بەرەتىن زاڭ جوباسى اقش-تىڭ سەناتىندا دا، وكىلدەر پالاتاسىندا دا باسىم كوپ داۋىسپەن قابىلدانۋى نازار اۋدارۋعا تۇرارلىق. جاڭا زاڭمەن 2021 جىلى اقش قورعانىس بيۋدجەتى 740,5 ملرد دوللار بولىپ بەكىتىلدى. بۇل قاراجات اسكەري جالاقىدان تارتىپ، قارۋ-جاراق ساتىپ الۋ، وزگە دە قاجەتتى اسپەكتىلەردى قامتيدى. ەڭ ماڭىزدىسى، قىتايدى تەجەۋدىڭ ماڭىزدى بولەگى رەتىندە، اتالعان زاڭ جاڭا «تىنىق مۇحيتىنداعى توسقاۋىل باعدارلاماسىن» باستايدى.  ۇندى-تىنىق مۇحيتى ايماعىندا اقش-تىڭ تەجەۋ مۇمكىندىگى مەن قورعانىس جاعدايىن نىعايتۋ، وداقتاستارمەن ىنتىماقتاستىقتى تەرەڭدەتۋ ءۇشىن 2021 قارجى جىلى بۇل جوباعا 2,2 ميلليارد دوللار بولەدى.

2,2 ملرد اقش دوللارى بۇل ايماقتاعى جاعدايدى تۇبەگەيلى وزگەرتىپ جىبەرمەيتىنى انىق. دەگەنمەن، جاڭا «تىنىق مۇحيتتاعى توسقاۋىل باعدارلاماسى» ەڭ الدىمەن قىتايعا، سودان كەيىن قانداي دا ءبىر ىقتيمال قاتەرلەرگە جانە ايماقتاعى اقش وداقتاستارىنا كۇشتى سيگنال بەرۋمەن تەڭ. ياعني، اقش ءوزىنىڭ اتالعان ايماقتاعى مۇددەسىن قورعاۋعا بەلسەندى كىرىسەتىنىن كورسەتەدى. بۇنى سونداي-اق، اقش-تىڭ ازياعا قاتىستى سوڭعى جىلدارداعى ەڭ ماڭىزدى زاڭ اكتىسى قاتارىندا باعالاۋعا بولادى. دەمەك، اقش ازياداعى ستراتەگياسىن وزگەرتۋدە. قۇراما شتاتتاردىڭ ازيا-تىنىق مۇحيت ايماعىنا باسا نازار اۋدارۋى ۇزاققا جالعاسۋى دا مۇمكىن.

 

“The Qazaq Times”