بۇعان دەيىن اقپارات قۇرالدارىندا حابارلانعانداي، يراننىڭ «يادرولىق قارۋىنىڭ اتاسى» اتالعان موحسەن فاحريزادەننىڭ ولىمىنە تەھران بيلىگى ءيزرايلدى ايىپتاپ، بۇل ءىس ءۇشىن كەك الاتىندارىن ايتقان ەدى. كەشە يران قىزمەتى فاحريزادەنگە يزرايل تارابى «الىستان باسقارىلاتىن قۇرال» ارقىلى قاستاندىق جاسادى دەپ مالىمدەدى.

يران ارنايى قىزمەتىنىڭ جەتەكشىسى الي شامحانيدىڭ ايتۋىنشا، قاستاندىق جاساۋشىلار «ەلەكتروندى جابدىقتاردى پايدالانعان» ەكەن. ول سونداي-اق، يران جاۋلارى بۇعان ەرتەدەن وتە مۇقيات دايىندالعان دەگەن پىكىرىن ايتتى.

دەگەنمەن، تەھران بيلىگى فاحريزادەننىڭ ءولىمى جايىندا قاراما-قايشى مالىمدەمەلەر دە جاسادى. جەرگىلىكتى باسىلىمداردىڭ حابارلارىندا، عالىمنىڭ كولىگىنە وق جاۋدىرىلعان جانە ول اۋىر جاراقات الىپ، ەمحانادا جان تاپسىرعان. اقپارات قۇرالدارىنا تاراعان كولىكتىڭ سۋرەتىنەن دە وق ىزدەرىن انىق كورۋگە بولادى. تەھران بيلىگى الدىمەن عالىمنىڭ وققاعارلارى مەن شابۋىل جاساۋشىلار اراسىندا وق اتىستىڭ بولعانىن ايتقان بولاتىن. الايدا، ءبىر كۇننەن كەيىن يراندىق رەسمي باق فاحريزاندەنگە «الىستان باسقارىلاتىن» نەمەسە «سپۋتنيگ ارقىلى باسقارىلاتىن اپپاراتپەن شابۋىل جاسالعانى» تۋرالى حابارلاپ جاتتى.

يران پرەزيدەنتى حاسان رۋحاني تەلە-جولداۋىندا فاحريزادەننىڭ ولىمىنە ەۆرەي بيلىگىن ايىپتاسا، رۋحاني كوسەمى حومەنەي قاستاندىق ۇىمداستىرۋشىلاردى تاۋىپ جازاعا تارتۋعا تاپسىرما بەردى. بۇعان قارسى يزرايل تارابى رەسمي جاۋاپ قاتقان جوق.

جالپى، بۇل يراننىڭ يادرولىق باعدارلاماسىنا قاتىستى تۇلعالارعا جاسالعان العاشقى شابۋىل ەمەس. 2010-2012 جىلدار اراسىندا يران يادرولىق باعدارلاماسىنىڭ ءتورت بىردەي مامانى قولدى بولعان ەدى. وندا دا تەھران تەل-ءاۆيۆتى ايىپتاعان، بىراق ناقتى دالەل كورسەتە الماعان.

قالاي بولماسىن، موحسەن فاحريزادەنتتىڭ ءولىمى يران ارنايى قىزمەتى ءۇشىن ۇلكەن سوققى دەۋگە بولادى. BBC-ءدىڭ پارسى تىلىندەگى قىزمەتى بولسا فاحريزادەننىڭ ءولىمى يران ارنايى قىزمەتىنىڭ ىشىندە باتىس پەن يزرايلگە جۇمىس ىستەيتىن ادامداردىڭ بولۋى ىقتيمال ەكەنىن كورسەتتى دەگەن بولجام جاسادى. ايتۋلارىنشا، يادرولىق باعدارلامانى جاساۋشى ماماندى سونداي جانسىزدار ۇيىمداستىرعان بولۋى مۇمكىن.

“The Qazaq Times”