COVID-19 جاڭا كوروناۆيرۋسىنىڭ ۆيزۋال مودەلى. كورنەكى سۋرەت. فوتو: www.who.int

قازاقستاندا 26 قاراشا 813 ادامنان كوروناۆيرۋس، ال سارسەنبىدە 161 ادامنان كوروناۆيرۋس پنەۆمونياسى انىقتالدى. قازىرگى تاڭدا 22,7 مىڭنان استام (كۆي+ 11 816, كۆي- 10 955) ادام اۋىرىپ جاتىر. 

#كوروناۆيرۋس كەشە، قاراشانىڭ 26-سى كوروناۆيرۋس جۇقتىرعان 563 ادام ايىعىپ شىقسا, 5 ادام ومىردەن وتكەن. جاڭادان تىركەلگەن ناۋقاستاردىڭ ەڭ كوبى –  شقو (170) جانە سقو (117), پاۆلودار (107), اقمولا (76), قاراعاندى (75) وبلىستارى، الماتى قالاسى (74) مەن استانادان (71). قىزىلوردا جانە ماڭعىستاۋ وبلىستارىندا ۆيرۋس جۇقتىرعاندار مۇلدەم انىقتالماعان.

ءبىر ايدان بەرى ەپيدەميا احۋالى ۋشىعىپ تۇرعان شقو-داعى جۇقتىرعاندار سانى قاراشا ايى باستالعالى 5861-گە جەتتى. ەكىنشى قاتاردا پاۆلودار (1746), ودان كەيىن سولتۇستىك قازاقستان (1599) وبلىستارى ورنالاسقان. ازىرگە جاعداي تۇراقتى وڭىرلەر – قىزىلوردا (27), ماڭعىستاۋ (28), تۇركىستان (53) وبلىستارى. مۇنىڭ بارلىعى قاراشا ايىنداعى رەسمي جيىنتىق ەسەپ.

دەنمين-ءنىڭ رەسمي مالىمەتىنشە, ەمدەلىپ جاتقان 11,8 مىڭنان استام ناۋقاستىڭ 3276-سى اۋرۋحانادا. تاعى 8540 ادام امبۋلاتورلىق تەراپيادا. ولاردىڭ اراسىندا 781 بالا ەمدەلىپ جاتىر. كەيىنگى ونكۇندىكتە اۋىرىپ جاتقان بالالار كۇرت كوبەيدى.

احۋالى ناشار 208 ناۋقاستىڭ اراسىندا 31 ادامنىڭ جاعدايى قاتتى قيىنداعان. جانە 30 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 129 مىڭنان استام ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 115 مىڭنان ءسال اسادى. بۇل جالپى ناۋقاستاردىڭ 95%-دان استامى. قازان ايىنىڭ ورتاسىنان بەرى ەلدە كوروناۆيرۋس قايتا ەكپىن الا باستادى. دەسە دە پرەزيدەنت توقاەۆ 16 قاراشا كۇنگى مالىمدەمەسىندە سولتۇستىك جانە شىعىس ايماقتاردا ستاتيستيكانىڭ بۇرمالانعانىن ايتقان. رەداكتسيا پاۆلودار وبلىسىندا 59, قوستاناي وڭىرىندە 57 جاعدايدىڭ جاسىرىلعانىن اكىمدەردەن سۇراپ، انىقتاعان.

#كوروناۆيرۋس_پنەۆمونياسى سونىمەن قوسا، كوروناۆيرۋس پنەۆمونياسىنا شالدىققان 161 ادام تىركەلگەن. تاعى 73 ادام ايىعىپ شىققان، 5 ادام قايتىس بولعان.  پنەۆمونياعا شالدىققان 41,7 مىڭ ادامنىڭ 30 مىڭنان استامى جازىلىپ شىققان.

ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. قازىر كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر ءاۋ باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەدى. ونىڭ وزىندە قۇجات فورماتىندا سايتقا جۇكتەلەدى، ۆەدومستۆو رەسۋرستارىندا اشىق ءارى تۇسىنىكتى جاريالانبايدى.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... قازاقستاندا كوروناۆيرۋس ءولىمى ازايماي تۇر. قاراشا ايىندا 20,5 مىڭنان استام ادام اۋىرعان جانە 200-گە جۋىق ادام ومىردەن وتكەن. بۇل قازان ايىندا تىركەلگەن تولىق جيىنتىقتان دا كوپ. رەسمي دەرەككە سايكەس، وتكەن ايدا 9,5 مىڭداي قازاقستاندىق اۋىرعان (4439 ادام كۆي+, 4984 ادام كۆي-) جانە 165 ادام ومىردەن وتكەن (118 ادام كۆي+, 47 ادام كۆي-). 

وسىلايشا ءبىرىنشى تولقىننىڭ شارىقتاۋ شەگى – «ماۋسىم-شىلدە قىرعىنان» كەيىنگى تامىز ايىنان بەرى قازاقستاندا دەرت جۇقتىرىپ اۋىرعاندار 110 مىڭنان اسقان. وسى ءتورت ايدىڭ ىشىندە ىندەتتەن 1,4 مىڭداي ادام ومىردەن وتكەن.

پنەۆمونيانىڭ كوروناۆيرۋستان باسقا تۇرلەرىنە شالدىققاندار سانى 358 مىڭعا جاقىندادى. جيىنتىق ەسەبى، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 129 مىڭنان اسسا، 1 تامىزدان بەرگى كوروناۆيرۋس پنەۆمونياسى 42 مىڭعا جاقىنداعان. ددسۇ مالىمەتىنشە، قازاقستاندا اۋىرعانداردىڭ سانى 170 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3161-ءى (كۆي+ / U07.1 – 2013, كۆي- / U07.2 – 439, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"