«اقجاعلىلار ايلاسى – سوتقا جەتپەيتىن ءىس»: ءباپيدىڭ باسىنان كەشكەنى

16 قاراشادا الماتى قالاسىنىڭ اكىمشىلىك سوتىندا «دات» گازەتىنىڭ جەتەكشىسى، جۋرناليست ەرمۇرات ءباپيدىڭ ءوتۋى ءتيىس سوتى توقتاتىلدى.

ول بۇگىن تاڭەرتەڭ ساعات 10:00-دا ىسپەن تانىسپاق ماقساتپەن سوتقا بارعان. بەلگىلى ءجۋرناليستىڭ سوزىنشە، مەدەۋ اۋداندىق پوليتسيا باسقارماسىنىڭ وكىلى وعان ءىستىڭ توقتاعانىن حابارلاپ، «اعا، ءسىز بوسسىز، مەن ءسىزدى شىعارىپ سالۋ كەرەكپىن» دەپ شىعارىپ سالعان.

ەرمۇرات باپي مۇنى ءوزىن ميتينگىگە قاستىستىرماس ءۇشىن جاسالعان «اكىمشىلىك ايلا» دەپ سانايدى. سوتتان ءىستىڭ نە سەبەپتى توقتاتىلعانىن ءتۇسىندىرۋدى تالاپ ەتكەن بەلسەندىگە ەشقانداي تۇششىمدى جاۋاپ بەرىلمەگەن.

«قازىر بەلگىلى بولىپ وتىر، مەنى جانبولات مامايدىڭ ميتينگىسىنە جىبەرمەۋ ءۇشىن ۇستاعان. الدىندا تورەعوجينا مەن اعەلەۋوۆتىڭ ميتينگىسىندە مەن سويلەگەنمىن. وندا قازاقستانداعى ساياسي رەفورما، مودەرنيزاتسيا، نازارباەۆتىڭ بيلىكتەن كەتۋىمەن بايلانىستى ەكەنىن، ول كەتپەي ەشقانداي وزگەرىس بولمايتىنىن، وزگەرىس بولۋ ءۇشىن ول زەينەتكە شىعىپ، قاۋىپسىزدىك كەڭەسى توراعاسىنىڭ وكىلەتىن ۇكىمەتكە قايتارىپ بەرۋ كەرەك دەپ ايتقانمىن. سودان بولۋى كەرەك، مىنا ميتينگتە دە «راديكالنىي» دۇنيە ايتاما دەپ، جىبەرمەي قويدى»، – دەيدى باپي اقپارات قۇرالىنا بەرگەن پىكىرىندە.

وتكەن سەنبى ساياسي رەفورمالاۋدى تالاپ ەتكەن دەمپارتيا مەن «باسە» YouTube ارناسىنىڭ شاقىرۋىمەن الماتىدا سانكتسيالانعان ميتينگ وتكەن. شەرۋدىڭ باستالۋىنا بىرەر ساعات قالعاندا ەرمۇرات باپي جولاي ۇستالىپ، ۇستىنەن اكىمشىلىك كودەكستىڭ 488-بابى بويىنشا (بەيبىت جيىن وتكىزۋ ءتارتىبىن بۇزۋ) ءىس قوزعالعانى حابارلانعان. جۋرناليست مۇنى قاراشانىڭ 13-ءى قۇقىق قورعاۋشىلار «ساياسي قۇربان» سانايتىن دۋلات اعادىلدىڭ ۇلى جانبولات اعادىلدىڭ مەزگىلسىز قازاسىنا ازا تۇتىپ، زاڭدا بەلگىلەنگەن شەرۋ ايماعىنا بارعانى ءۇشىن قوزعالعانىن ايتادى.

“The Qazaq Times”