اقش-تاعى پرەزيدەنت سايلاۋىندا دەموكراتتاردىڭ ۇمىتكەرى جوزەف بايدەن باسىم تۇسكەنىمەن، اق ءۇي تارابىندا بيلىكتى وتكىزىپ بەرۋ تۋراسىندا ەشقانداي ارەكەتتەر جاسالىپ جاتقان جوق. ترامپ اكىمشىلىگى قالىپتى جۇمىسىن جالعاستىرىپ، الداعى جىلدارعا بەلگىلەنگەن ستراتەگيالارعا قاتىستى قادامدارىن جاساۋدا.

رەسپۋبليكاشىلدارعا جاقتاس Washington Post باسىلىمى ترامپ اكىمشىلىگى 2022 جىلدىڭ بيۋدجەتى جوسپارلاۋعا كىرىسىپ كەتكەنىن جازدى. ودان وزگە دە الداعى جىلدارعا ارنالعان ستراتەگيالارعا قاتىستى قادىمعى قادامدارىن جاساپ جاتقانى تۋرالى دا وزگە باسىلىمدار حابارلاۋدا.

مەملەكەتتىك حاتشى مايكل پومپەو بولسا «زاڭدى داۋىستار» قايتا سانالىپ بولعاننان كەيىن، ترامپ ەكىنشى مەرزىم پرەزيدەنتتىك قىزمەتىن قالىپتى اتقارا بەرەتىنىن ايتقان.

ال، جوزەف بايەن 20 قاڭتارعا بەلگىلەنگەن ينناۋگۋراتسياعا دايىندالىپ جاتىر. الايدا قازىرگى ترامپ ادمينيستراتسياسى بيلىكتى وتكەرىپ بەرۋ تۋراسىنداعى ەشقانداي قادام جاساماسا، جاڭا پرەزيدەنتكە ارنايى جۇمىس كەڭسەسىن دايىنداۋ، بايلانىس قۇرالدارى جانە وزگەدە قاجەتتىكتەرىن ۇيىمداستىرۋ مۇمكىن ەمەس.

بايدەن ءوزىنىڭ مالىمدەمەسىندە ترامپتىڭ كەزدەسۋدەن باس تارتۋى جانە سايلاۋدىڭ قورىتىندىسىن مويىنداماي تۇرعانى، سونداي-اق، اكىمشىلىگى تارابىنان ەشقانداي بيلىكتى وتكەرىپ بەرۋ دايىندىقتارىنا كىرىسپەۋى ىڭعايسىز جاعدايعا قالدىرعانىن ايتقان.

قازىرگە دەيىن ەشبىر شتاتتا سايلاۋ ناتيجەسى تولىق ءارى رەسمي تۇراقتانعان جوق. الايدا، بيۋللەتەندەردىڭ 90 پايىزى سانالىپ بولدى. رەسپۋبليكاشىلداردىڭ ارىزىمەن كەيبىر شتاتتاردا داۋىستار قايتا سانالىپ جاتقانىن امەريكالىق باسىلىمدار جازىپ جاتىر. بىراق، پرەزيدەنت ترامپتىڭ زاڭگەرلەرى جولداعان كوپتەگەن ارىز كەرى قايتارىلعان.

دۇيسەنبى كۇنى رەسپۋبليكاشىلدار پارتياسىنىڭ ليدەرى ميتچ موكوننەل ترامپتىڭ داۋىس بەرۋ ناتيجەسى بويىنشا سوتقا جۇگىنۋگە قۇقىعى بار ەكەنىن ايتتى. وسىلايشا، سايلاۋ اياقتالعانىمەن، اقش-تىڭ كەزەكتى پرەزيدەنتىنىڭ انىق كىم بولاتىنى ءالى ءدۇدامال كۇيدە تۇر.

“The Qazaq Times”