بۇگىن اقش-تاعى پرەزيدەنت سايلاۋىنىڭ سوڭعى كۇنى، سايلاۋدىڭ قىزۋ باسەكەدە وتۋىنە وراي قورىتىندى ناتيجە بەلگىلى بولعاننان كەيىن ءىرى قالالاردا دۇربەلەڭ بولۋى دا مۇمكىن دەپ بولجانۋدا.

ەكى كۇننەن بەرى ءىرى قالالارى بولۋى ىقتيمال دۇربەلەڭگە الدىن-الا دايىندىقتارىن كورۋدە. ۋاشينگتوندا بانك، قوناق ءۇي، رەستوران سەكىلدى عيماراتتاردىڭ سىرتىنا ارنايى قورشاۋلار تۇرعىزۋدا. كوشە بويىنداعى كوپتەگەن دۇكەندەر جۇمىسىن ۋاقىتشا توقتاتىپ، ەسىك-تەرەزەلەرىن مىقتاپ جاۋىپ جاتقانى تۋرالى حابارلانۋدا.

الەۋمەتتىك ساۋالناما ناتيجەسىنە ساي، داۋىس بەرۋشىلەردىڭ 56 پايىزى سايلاۋدىڭ رەسمي كۇنى نارازىلىق شارالار كۇشەيىپ، تاڭداۋى ۇقساماعان ازاماتتار اراسىندا قاقتىعىس بولۋى دا مۇمكىن دەپ ەسەپتەيدى.

قۇراما شتاتتارداعى قازىرگى الەۋمەتتىك كوڭىل-كۇيگە وراي بىرقاتار شتاتتار مەن ءىرى قالالاردىڭ قاۋىپسىزدىك قىزمەتكەرلەرى دۇربەلەڭگە قارسى شارالار كورىپ جاتىر. فەدەرالدىق قاۋىپسىزدىك كۇشتەر كوبەيتىلىپ، بىرنەشە قالالاردا قارۋلى پوليتسيا كوشەلەردى شارلاپ ءجۇر.

اق ۇيدەگى دەرەك كوزدەرىنە سىلتەمە جاساعان بىرنەشە امەريكالىق ارنالار سايلاۋدا دونالد ترامپ جەڭىسكە جەتسە قوعامدىق دۇربەلەڭ بولىپ كەتۋى مۇمكىن ەكەنى تۋرالى مالىمەتتەردىڭ بار ەكەنىن دە حابارلادى. فەدەرالدىق ۇكىمەتتىڭ مالىمەتىنشە، مۇنداي دۇربەلەڭدەر جوۋ بايدەندى كوبىرەك قولداعان نيۋ-يورك، ۋاشينگتون سەكىلدى ءىرى قالالاردا بولۋى ىقتيمال. ەگەر دەموكراتتاردىڭ ۇمىتكەرى جەڭىپ شىقسا وندا ماسسالىق جۇرىستەر بولماۋى دا مۇمكىن.

بۇنداي قوعامدىق كوڭىل-كۇيدى پرەزيدەنت دونالد ترامپتىڭ مالىمدەمەلەرى پايدا قىلدى دەپ سانايتىندار دا بار. سوڭعى ايلارداعى مالىمدەمەلەرىندە ترامپ «سايلاۋ ناتيجەسى جاريالانعان كۇنى داۋىس بەرۋ ورىندارىنا كەلىپ دەموكراتتاردان «جەڭىستى قورعاپ قالىڭدار» دەگەن سوزدەرى دە بار. سونداي-اق، ترامپ قارسىلاسى جوۋ بايدەننىڭ ۇتىپ شىعاتىنىنا سەنبەيدى، ءارى بيلىكتى بەيبىت جولمەن وتكىزىپ بەرۋگە دە ۋادە بەرمەگەن.

“The Qazaq Times”