فوتو: https://liter.kz

قازاقستاندا وتكەن تاۋلىكتە تاعى 442 ادام كوروناۆيرۋس جۇقتىرىپ، 5 ادام قايتىس بولعان. ۆيرۋس جۇقتىرعانداردىڭ 245-ءى شقو-دا تىركەلدى.

رەسمي دەرەك بويىنشا، 41 ادامنىڭ كوروناۆيرۋس پنەۆمونياسىنا شالدىققانى انىقتالدى. ءبىر كۇندە 32 ادام جازىلعان. تاۋلىك ىشىندە اۋرۋدىڭ وسى ءتۇرى بويىنشا ادام ءولىمى تىركەلمەگەن.

دەنساۋلىق ساقتاۋ مينيسترلىگىنىڭ مالىمەتىنشە، قازىر كوروناۆيرۋس پنەۆمونياسىنان 4 489 ادام ەمدەلىپ جاتىر. ونىڭ 2 420-ءسى ستاتسيوناردا، 2069-ى امبۋلاتورلىق جاعدايدا ەم قابىلداپ جاتىر. 150 ناۋقاستىڭ احۋالى ناشار، 15 ادامنىڭ جاعدايى – وتە اۋىر، 22 ادام وكپەنى جاساندى جەلدەتۋ اپپاراتىنا قوسىلعان.

ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. ال كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر و باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەتىن بولدى. ونىڭ وزىندە قۇجات فورماتىندا سايتقا جۇكتەپ وتىرادى، ۆەدومستۆو سايتىندا اشىق ءارى تۇسىنىكتى تىلدە تالداپ جاريالامايدى.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

"The Qazaq Times"