لۋكاشەنكو ۋلتيماتۋمى اياقتالدى: بەلارۋستە جالپىۇلتتىق ەرەۋىل باستالادى

25 قازاندا مينسك پەن ەلدىڭ باسقا قالالارىندا ءجۇز مىڭنان استام ادام شەرۋگە شىقتى. بۇل جولى بيلىك نارازىلارعا كەدەرگى بولۋ ءۇشىن گراناتا، قارۋ قولدانعان. بەلارۋس وپپوزيتسياسىنىڭ پرەزيدەنت لۋكاشەنكوعا جاريالاعان ۋلتيماتۋمى ءوز ناتيجەسىن بەرگەن جوق. ەندى ەلدە جالپىۇلتتىق ەرەۋىل باستالماق.

وپپوزيتسيا اتىنان سۆەتلانا تيحانوۆسكايا 26 قازانعا دەيىن لۋكاشەنكونىڭ وتستاۆكاسىن، ساياسي تۇتقىنداردى بوساتۋدى جانە كوشەدەگى زورلىق-زومبىلىقتى توقتاتۋدى تالاپ ەتكەن. الايدا ۋلتيماتۋم ناتيجەسىز: بيلىك حالىقپەن ديالوگ جۇرگىزۋدىڭ ورنىنا كۇش قولدانىپ، وق اتتى.

جەرگىلىكتى باسىلىمدارعا سۇحبات بەرگەن تيحانوۆسكايا: «بۇگىن رەجيم قولىنان كۇش قولدانۋ عانا كەلەتىنىن تاعى ءبىر رەت دالەلدەدى. الايدا كوپكە جانە پەرزەنتحانا تەرەزەسىنىڭ تۇبىنە قۇلاق تۇندىراتىن گراناتا لاقتىرۋ – كۇش ەمەس. رەجيم شىندىقتى ايتىپ، ءوز سوزىنە جاۋاپ بەرۋگە جانە ادامداردىڭ تالاپتارىن ورىنداۋعا دايىن ەمەس. دەمەك، بۇل رەجيم بەلورۋس حالقىنا لايىق ەمەس»، – دەپ مالىمدەدى.

بەلارۋستەگى نارازىلىق شەرۋلەرىنە ەكى ايدان استام ۋاقىت ءوتتى. 9 تامىزدا وتكەن پرەزيدەنتتىك سايلاۋدا وسك الەكساندر لۋكاشەنكونىڭ 80% -دان استام، ال سۆەتلانا تيحانوۆسكايا 10% -دان ءسال ارتىق داۋىس جيناعانىن جاريالاعان. كەيىننەن بەلارۋس وپپوزيتسيا وكىلدەرى سايلاۋ ناتيجەسىن جويىپ، قايتادان سايلاۋ وتكىزۋدى تالاپ ەتتى. رەسمي مالىمەتپەن كەلىسپەگەن حالىق تا جاپپاي نارازىلىق اكتسياسىنا شىقتى، ال بيلىك ولاردى اياۋسىز باسۋمەن بولدى. بەلارۋستەگى «دەموكراتيا جولىنداعى كۇرەس» ءالى دە جالعاسىپ كەلەدى.

الەكساندر لۋكاشەنكو مەن ونىڭ جاقتاستارى سايلاۋ ءادىل ءوتتى دەپ سانايدى. ال ەۋروپالىق وداق پەن اقش نارازىلىق شەرۋلەرىن قولداپ، بەلارۋس بيلىگىنىڭ بىرقاتار وكىلدەرىنە سانكتسيا ەنگىزۋ تۋرالى شەشىم شىعاردى. ال قازاقستان بيلىگى الەكساندر لۋكاشەنكونى العاشقىلاردىڭ ءبىرى بولىپ، سايلاۋداعى «جەڭىسىمەن» قۇتتىقتاعان.

"The Qazaq Times"