قحر قۇرىلعاندىعىنىڭ 70 جىلدىعىنا وراي Dongfeng-17 ءبىرىنشى رەت جۇرت الدىنا شىعارىلعان بولاتىن. فوتو: VOA

قازىر قىتايدىڭ حالىق-ازاتتىق ارمياسى تايۋانعا شابۋىل جاساۋدىڭ دايىندىق كۇيىندە تۇر. بۇل شابۋىل بولا ما، بولماي ما ءوز الدىنا، دەگەنمەن قىتاي قارۋلى كۇشتەرى تايۋانعان جاقىن تەڭىز جاعالاۋلارىندا زىمىران بازاسىن جاڭارتىلىپ، تۇرلەندىرىلىپ، ەڭ وزىق بالليستيكالىق زىمىراندار ورنالاستىرۋدا. 

قىتايدىڭ كوممۋنيستىك پارتياسى ساتىپ العان South China Morning Post باسىلىمى كەشە حالىق-ازاتتىق ارمياسىنىڭ تايۋانعا جاقىن وڭتۇستىك-شىعىس جاعالاۋلارعا دىبىستان جىلدام ۇشاتىن Dongfeng-17 زىمىراندارى ورناتىلا باستاعانىن جازدى. بۇعان دەيىن ونداعان جىلدار بويى تەڭىز جاعالاۋلارىنا Dongfeng-11 جانە Dongfeng-15 زىمىراندارى قويىلىپ كەلگەن ەدى.

Dongfeng-17 زىمىرانىنىڭ سوققى دالدىگى جوعارى جانە ماكسيمالدى قاشىقتىعى 2500 شاقىرىمعا جەتەدى، بىلتىر 1 قازاندا قىتاي كوممۋنيستىك پارتياسىنىڭ 70 جىلدىعىنا ارنالعان اسكەري پارادتا تانىستىرىلعان بولاتىن.

سپۋتينكتەن تۇسىرىلگەن سۋرەتتەر جانە كەيىبر باسىمداردىڭ قولعا كەلتىرگەن مالىمەتتەرى بويىنشا، قىتايدىڭ تايۋان ارالىنا جاقىن فۋجيان جانە گۋاڭدۇڭ (گۋاندۋن) پروۆينتسيالارىنداعى زىمىران كۇشتەرى سوڭعى جىلدا كەڭەيتىلگەن. بۇل پروۆينتسياداعى اسكەري بازالاردا ورنالاستىرىلعان بۇرىنعى Dongfeng-11 جانە Dongfeng-15 زىمىراندارى تايۋان بۇعازىنان ءوتىپ، ارالدىڭ باتىس جاعالاۋىنداعى ستراتەگيالى ماڭىزدى نۇكتەلەرگە شابۋىل جاساۋعا قابىلەتتى بولماعان.

بۇل ارەكەتتەر قىتاي حالىق-ازاتتىق ارمياسىنىڭ تايۋانعا قارسى شابۋىل دايىندىعىن كۇشەيتىپ جاتقانىن بىلدىرەدى. دەگەنمەن، تايۋاننىڭ ستراتەگيالىق زەرتتەۋ ورتالىقتارى اقاپارات قۇرالدارىنا بەرگەن جاۋابىندا، اتالعان جاڭا زىمىراننىڭ تايۋانعا شابۋىل جاساۋعا قابىلەتتى بولعانىمەن، تىپتىدە الىس قاشىقتىققا جەتەتىن زىمىراندارىن ارالعا جاسالاتىن شابۋىلعا پايدالانا قويۋى ەكىتالاي دەگەن بولجامدارىن ايتقان.

تايۋاندىق مامانداردىڭ پىكىرىنشە قىتاي حالىق-ازاتتىق ارمياسى بۇل زىمىرانداردى اقش بازالارى مەن تايۋانعا كومەك بەرۋى مۇمكىن اقش كەمەلەرىنە دايىنداپ وتىر دەگەن دە بولجامدارىن العا تارتقان. بىلتىر عانا اسكەري ماقساتتاردا پايدالانۋعا بەرىلگەن Dongfeng-17 زىمىرانىنىڭ سانى 100-گە جەتپەيدى دەپ بولجانۋدا.

قىتايدىڭ تايۋانعا جاقىن جاعالاۋلارعا زىمىراندارىن ورنالاستىرۋ ارقىلى سەس كورسەتۋ ارەكەتى بۇعان دەيىن دە بولعان ەدى. تايۋاننىڭ دەموكراتيالىق پروگرەسسيۆتى پارتياسىنىڭ جەتەكشىسى بيلىككە كەلگەندە دە قىتاي تارابى فۋجيان جانە جىجيان پروۆينتسيالارىنا بالليستيكالىق زىمىراندار ورنالاستىرىپ، تايبەي بيلىگىنە قوقانلوقى جاساعان بولاتىن.

“The Qazaq Times”