الەمدە كوروناۆيرۋسقا قايتا شالدىققان العاشقى ناۋقاس قايتىس بولدى

نيدەرلاندىدا كوروناۆيرۋستان ەكىنشى رەت اۋىرعان 89 جاستاعى ايەل قايتىس بولعانى تۋرالى رەسمي اقپارات كوپتەگەن ەلدەردە قىزۋ تالقىلانىپ جاتىر.

نيدەرلاندى عالىمدارىنىڭ دەرەگىنشە، ناۋقاس بۇرىن كوروناۆيرۋسقا شالدىعىپ، ايىققان. الايدا ەكى ايدان سوڭ COVID-19 ينفەكتسياسىنان قايتا اۋىرعان. سىرقاتتىڭ جاعدايى بىرنەشە كۇن وتپەي ناشارلاپ، ەكى اپتادان كەيىن اۋرۋحانادا قايتىس بولعان. ول بۇعان دەيىن قان جاسۋشالارىنىڭ اۋرۋى جانە يممۋن تاپشىلىعىنىڭ جەتىسپەۋشىلىگىنەن قينالعان.

BNO شەتەلدىك اقپارات قۇرالىنىڭ Oxford ۋنيۆەرسيتەتى باسىلىمىنا سىلتەپ جاريالاعان دەرەگىنە سايكەس، قارت سىرقات ەكى ايدا كوروناۆيرۋستان ەكى رەت اۋىرعان.

بۇعان دەيىن نيدەرلاندىدا ەگدە جاستاعى ناۋقاستىڭ يممۋندىق جۇيەسى السىرەۋى سەبەپتى قايتا اۋىرعانى، سونداي-اق، 33 جاستاعى گونكونگ ازاماتى ەۋروپادان ورالعان بويدا قايتا اۋىرعانى ايتىلعان. ددسۇ مۇنى انتيدەنەنىڭ ۋاقىت وتە السىرەۋىمەن تۇسىندىرەدى، بىراق بۇل ءجيى كەزدەسپەۋى مۇمكىن. دەسە دە جاڭا ىندەتتىڭ تابيعاتى جەتە زەرتتەلىپ بولماعاندىقتان، ناقتى كلينيكالىق مەرزىمىن ايتا قويۋ قيىن.

كۇزگى تولقىن قارساڭىندا ددسۇ ناۋقاستار مەن قايتقاندار سانى رەكوردتىق كورسەتكىشكە جەتكەنىن مالىمدەدى. وتكەن اپتادا 2,2 ملن-نان استام ادامنان ۆيرۋس انىقتالسا، 39 مىڭداي ناۋقاس ومىردەن وتكەن. دجونس حوپكينس ۋنيۆەرسيتەتىنىڭ دەرەگىنە قاراعاندا، بۇگىنگى تاڭدا ۆيرۋس جۇققاندار قاتارى  37,8 ملن-نان، قايتىس بولعاندار سانى 1,08 ملن-نان اسقان.

"The Qazaq Times"