ءسۇريانىڭ (سيريا) حيميالىق شابۋىلىنا جاۋاپ رەتىندە اقش-تىڭ ءسۇريا اسكەري بازاسىن بومبىلاۋى، دونالد ترامپتىڭ باراك وبامانىڭ ۇستانعان «جۇمساق» ساياساتىن جالعاستىرمايتىنىن تاعى ءبىر دالەلدەدى.

ەستەرىڭىزدە بولسا 2013 جىلى وباما «باشار اساد رەجيمى شەكتەن شىعىپ بارادى» - دەپ قاتتى سىناعانىمەن، ءىس جۇزىنە كەلگەندە ەش نارسە جاساماعان ەدى. ال ترامپ بولسا، ءوزىنىڭ ديپلوماتياعا قاراعاندا، قارۋعا كوبىرەك جاقىن ەكەنىن بايقاتتى. قىتاي باسشىسى شي جينپيڭمەن كەزدەسۋىندە دە دونالد ترامپ، اسادتىڭ حيميالىق قارۋ قولدانعاندىعىن باسسىزدىققا بالاپ، رەسمي بەيجينگە سەس كورسەتكەندەي  اسەر قالدىردى. بايقاساق قىتاي، اقشتىڭ ءسۇريانى بومبىلاۋ ارەكەتىنە ەشقانداي ءۇن قاتقان جوق. ال  اق ءۇيدى، باراك وباما باسقارىپ تۇرعان كەزدە، قىتاي ءوزىنىڭ كوزقاراسىن بىلدىرۋدەن تايسالمايتىن.

2013 جىلعى كەلىسسوزدەردىڭ ارقاسىندا وباما «سۇرياداعى حيميالىق قارۋلاردىڭ كوبىسىنىڭ كوزى جويىلدى» - دەگەن ەدى. الايدا وسى كۇنگە دەيىن باشار اساد جەرگىلىكتى وپپوزيتسيا مەن «يسلام مەملەكەتى» ۇيىمىنا قارسى حيميالىق قارۋدى قولدانىپ كەلگەن. اسادتىڭ بۇل ءىس – ارەكەتىنە ترامپ، وباما سياقتى كەلىسسوز ارقىلى ەمەس، بومبىلاۋ ارقىلى جاۋاپ قاتقاندى ءجون كورىپتى. قالاي دەسەكتە وباما، ترامپتاي باتىل شەشىمدەر قابىلداۋدان كورى، كەلىسسوزگە، ديپلوماتياعا جاقىن ەدى. قازىرگى ترامپتىڭ ساياساتى وبامادان قاراعاندا، ۆلاديمير ءپۋتيننىڭ ساياساتىنا كوبىرەك ۇقسايدى.

“The Qazaq Times”