حالىقارالىق قاتىناستار كوميتەتىنىڭ مۇشەلەرى بەلارۋستەگى دەموكراتيا جانە ادام قۇقىقتارى تۋرالى زاڭ جوباسىن اقش كونگرەسى وكىلدەر پالاتاسىنا ۇسىندى.

كوميتەتتىڭ سايتىندا: «ءبىز كوشەدە دەمونستراتسيالاردى جالعاستىرىپ، ەلدەگى دەموكراتيانى كۇشەيتۋدى تالاپ ەتكەن بەيبىت شەرۋشىلەردى قولدايمىز. بەلارۋس بيلىگى ادام قۇقىقتارىن تاپتاپ، قولدان رەپرەسسيا جاساعانى ءۇشىن جاۋاپ بەرۋى كەرەك»، – دەيدى زاڭ جوباسى اۆتورلارىنىڭ ءبىرى، رەسپۋبليكاشىل مايكل ماككولل.

قۇجاتقا سايكەس، اقش بيلىگى الەكساندر لۋكاشەنكونى بەلارۋستىڭ زاڭدى پرەزيدەنتى دەپ مويىندامايدى، سونىمەن قاتار ەقىۇ ستاندارتتارىنا سايكەس مەملەكەت باسشىسىنا جاڭا سايلاۋ وتكىزۋگە جانە بارلىق ساياسي تۇتقىنداردى بوساتۋعا شاقىرادى. زاڭ جوباسى بويىنشا تاۋەلسىز باق قىزمەتىنە توسقاۋىل قويعان بەلارۋس پەن رەسەي ازاماتتارىنىڭ سانكتسيالىق ءتىزىمىن كەڭەيتۋدى كوزدەيدى.

23 قىركۇيەكتە مينسكتەگى تاۋەلسىزدىك سارايىندا الەكساندر لۋكاشەنكونى ۇلىقتاۋ ءراسىمى ءوتتى. ول 9 تامىزدا وتكەن پرەزيدەنتتىك سايلاۋدا 80,10% داۋىسپەن التىنشى رەت مەملەكەت باسشىسى بوپ سايلاندى. سايلاۋدا 10,12% داۋىس جيناعان سۆەتلانا تيحانوۆسكايا سايلاۋ ناتيجەلەرىن مويىندامادى. وسىعان بايلانىستى ەلدە ءبىر ايدان استام ۋاقىت بويى بيىككە قارسى نارازىلىق اكتسيالارى ءوتىپ جاتىر. تاياۋدا تيحانوۆسكايا وپپوزيتسيانىڭ ۇيلەستىرۋ كەڭەسىن قۇرۋدى باستادى، ول جاڭا سايلاۋ جاريالانعانعا دەيىن نارازىلىق اكتسيالارىن جالعاستىرۋعا ۇندەيدى.

ەۋروپالىق وداق قۇرامىنداعى مەملەكەتتەر مەن امەريكا الەكساندر لۋكاشەنكودان قايتادان ءادىل سايلاۋ وتكىزۋدى تالاپ ەتكەن. رەسەي مەن مولدوۆا بۇل ماسەلەدە بەلارۋستىڭ ىشكى ساياساتىنا ارالاسپايتىنىن مالىمدەپ، باسقا مەملەكەتتەردىڭ بۇل قادامىن ايىپتادى. سونىمەن قاتار فرانتسيا پرەزيدەنتى ەممانۋەل ماكرون دا لۋكاشەنكونىڭ وتستاۆكاسىن تالاپ ەتكەن. وعان لۋكاشەنكو «ماكرون الدىمەن فرانتسيانىڭ ىشكى جاعدايىن رەتتەپ السىن!»، دەپ جاۋاپ قاتتى.

"The Qazaq Times"