قىتاي باسشىسى مەن بيلىكتى اشىق ءارى باتىل سىناپ كەلگەن قىتايلىق جىلجىمايتىن مۇلىك ماگناتى رىن جىچيان (رەن چجيتسيان/Ren Zhiqian) 18 جىلعا باس بوستاندىعىنان ايىرىلدى. وعان جەمقورلىق، پارا الۋ جانە مەملەكەتتىك كومپانيا قىزمەتكەرلەرىنىڭ وكىلەتتىكتەرىن اسىرا پايدالانۋ سەكىلدى ايىپتار تاعىلعان.

رىن جىچيان قىتاي بيلىگى مەن مەملەكەت باسشىسىن قاتاڭ سىناپ كەلگەن ساناۋلى ءىرى كاسىپكەردىڭ ءبىرى. بيلىككە دەگەن سىن پىكىرلەرىنە قاراتا ونىڭ «قىزىل زەڭبىرەك» دەگەن لاقاپ اتى دا بار. پروكۋراتۋرا وعان 1,25 ملن يۋان (شامامەن 184 مىڭ اقش دوللارى) كولەمىندە پارا الىپ، مەملەكەت قازىناسىنان 50 ملن يۋان ۇرلادى دەگەن ايىپ تاققان. بەيجىڭدەگى ورتا دارەجەلى حالىق سوتى شىعارعان شەشىمدە ونى 18 جىلعا باس بوستاندىعىنان شەكتەۋمەن بىرگە، 4,2 ملن يۋان (شامامەن 620 مىڭ اقش دوللارى) كولەمىندە ايىپپۇل سالعان.

رىن جىچيان ناۋرىز ايىندا قىتاي ۇكىمەتى مەن بيلىك وكىلدەرىن، ولاردىڭ كوروناۆيرۋس پاندەمياسىنداعى ارەكەتتەرىن ايىپتاعان بولاتىن. ونىڭ ماقالاسى قىتاي باسشىسى شي جينپيڭنىڭ تەلە-جولداۋىنان كەيىن جاريالانعان، الايدا وندا قىتاي باسشىسىنىڭ اتى اتالماعان. حالىقارالىق قۇقىق قورعاۋ ۇيىمدارى قىتاي بيلىگى جەمقورلىققا قارسى كۇرەستى ديسسيدەنتتەردى جازالاۋعا قولدانىپ جاتىر دەپ ايىپتايدى.

رىن جىچيان بۇرىن قۇرىلىسپەن اينالىساتىن Hua Yuan Property Company اتتى مەملەكەتتىك كومپانياعا جەتەكشىلىك ەتكەن. مەملەكەتتىك كومپانياعا باسشىلىق ەتكەن تۇستا ونىڭ جوعارى دارەجەلى لاۋازىمدى تۇلعالارمەن جاقىن بايلانىستا بولعانى انىق. ونىڭ ماقالاسى جاريالانعاننان كەيىن وعان قارسى تەرگەۋ جۇرگىزىلىپ جاتقانى تۋرالى حابارلار تاراعان. كەيىن قىتاي كوممۋنيستىك پارتياسى ونى پارتيا قاتارىنان شىعارعان.

قىتايدا ۇكىمەتتى جالپىلاما سىناۋ، پىكىر ايتۋ ءبىر باسقا دا، ليدەردى، ونىڭ وزىندە دە ونى «يمپەراتورعا ۇقساعىسى كەلەتىن جالاڭاش سايقىمازاققا» تەڭەۋ ءبىر باسقا. ارينە، بۇل ليدەرلەرىن «حالىقتىڭ قۇتقارۋشى پەرىشتەسى»، «جەردەگى جارتى قۇداي» رەتىندە كورەتىن قالىڭ حالىق ءۇشىن اشىق كۇندە جاي تۇسكەنمەن بىردەي ءسوز. ونىڭ ۇستىنە قازىر قىتايدا ماو ءداۋىرى سەكىلدى «كۇن كوسەمگە تابىندىرۋ» كۇشتى بەلەڭ العان. كوممۋنيستىك پارتيا بيلىگى ءۇشىن العاندا دا، ءوز قاتارىنداعى بۇرىنعى مەملەكەتتىك كومپانيا جەتەكشىسىنىڭ نارازى پىكىرى كەشىرىلمەس ايىپ بوپ سانالادى.

“The Qazaq Times”