كورنەكى سۋرەت. فوتو: اشىق دەرەككوز

اپتا باسىندا قازاقستاندا 65 ادامنان COVID-19 ينفەكتسياسى، 8 ادامنان كوروناۆيرۋس پنەۆمونياسى انىقتالدى. دۇيسەنبى كۇنى 7 ادام قايتىس بولعان.  

ءبىر اپتادان بەرى شىعىس قازاقستان وبلىسى كوۆيد تارالۋى بويىنشا 20 كەيسپەن ءبىرىنشى قاتاردا تۇر. اتىراۋ وبلىسىندا 9, بقو-دا 7, سقو-دا 6, قاراعاندى وبلىسىندا 5 ادامنىڭ ۆيرۋس جۇقتىرعان ناۋقاس انىقتالعان.

الماتى، تۇكىستان جانە اقمولا ايماقتارىندا 3 جاعدايدان، قوستاناي، پاۆلودار، اقتوبە وبلىستارىندا بىرەن-ساران كەيس تىركەلگەن. ۆيرۋس قارقىنى كەيىنگى كۇندەرى باسەڭدەگەن قىزىلوردا، ماڭعىستاۋ، جامبىل وبلىستارى مەن شىمكەنت قالاسىندا ەشبىر جاعداي تىركەلمەگەن.

قىركۇيەكتىڭ 14-ءى كۇنگى ۇكىمەت دەرەگىنشە، 4 كىسى كوروناۆيرۋستان قايتقان. ەمدەلىپ جاتقان 4,4 مىڭ ادامنىڭ 2 362-ءسى اۋرۋحانالاردا، ال 2 047 ناۋقاس امبۋلاتورلىق باقىلاۋدا. سونداي-اق، جاعدايى اۋىر 124 ناۋقاس بار. ونىڭ 20-سى تىم اۋىر حالدە جاتىر. 20 ادام وكپەنى جاساندى جەلدەتۋ اپپاراتىنا قوسىلعان.

وتكەن تاۋلىكتە كوروناۆيرۋس پنەۆمونياسىنا شالدىققان 3 ادامنىڭ جاعدايى وڭالماي، ومىردەن وتكەن.  بىراق دەنساۋلىق ساقتاۋ مينيسترلىگى اتالعان اۋرۋدىڭ كۇندەلىكتى كەيستەرىن ايماقتار بويىنشا جاريالامايدى. ايتپەسە بۇعان دەيىن ايماقتىق ءبولىنىسىن كەمىندە اپتا سايىن اشىق دەرەككوزدە جاريالاۋعا بىرنەشە رەت ءسوز بەرگەن. كوروناۆيرۋس پنەۆمونياسىنا شالدىققاندار تۋرالى بيلىك تۇششىمدى اقپارات بەرمەيدى. ەشبىر رەسمي رەسۋرستا كوروناۆيرۋس سياقتى اۋىرعانداردىڭ سانى، ايماقتارداعى ۇلەسى، كلينيكالىق جاعدايى، جاس قۇرامى تۋرالى پارامەترلەر مۇلدەم جاريالانبايدى.

1 تامىزدان بەرى كوروناۆيرۋس پنەۆمونياسىنا شالدىققاندار  29,6 مىڭنان اسسا،  13 ناۋرىزدان بەرى بيلىك مويىنداعان COVID-19 ينفەكتسياسىن جۇقتىرعاندار قاتارى 107 مىڭعا جۋىقتاعان.

ددسۇ مالىمەتىنشە، قازاقستاندا اۋىرعانداردىڭ سانى 136,5 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەپ كەلەدى.

پاندەميا باستالعالى جالپى جيىنى ۆيرۋس جۇققانداردىڭ 2 582   (كۆي+ / U07.1 – 1 675, كۆي- / U07.2 – 331, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

"The Qazaq Times"