دەنميننىڭ دەمالىس كۇنگى كۇماندى ەسەبى: اۋرۋ از تىركەلگەنىمەن، ءولىم جاعدايى كوپ

13 قىركۇيەكتە ەلدە 52 ادامنان COVID-19 ينفەكتسياسى، 77 ادامنان كوروناۆيرۋس پنەۆمونياسى انىقتالدى. ءبىر كۇندە 11 ادام قايتىس بولعان.  

ءبىر اپتادان بەرى شىعىس قازاقستان وبلىسى كوۆيد تارالۋى بويىنشا ءبىرىنشى قاتاردا تۇر.  جەكسەنبى كۇنى اتىراۋ وبلىسىندا دا 11 كوروناۆيرۋس جاعدايى انىقتالعان. باسقا وڭىرلەردەگى تاۋلىك ىشىندە تىركەلگەن كەيستەر سانى وننان اسپايدى.

ۆيرۋس قارقىنى كەيىنگى كۇندەرى باسەڭدەگەن تۇركىستان، قىزىلوردا، ماڭعىستاۋ وبلىستارى مەن الماتى، شىمكەنت قالالارىندا ەشبىر جاعداي تىركەلمەگەن. مۇنىڭ سەبەبى سەنبى-جەكسەنبى كۇندەرى مەديتسينالىق قۇرىلىمداردىڭ نەگىزگى قۇرىلىمدارى جۇمىس ىستەمەيدى.

قىركۇيەكتىڭ 13-ءى كۇنگى ۇكىمەت دەرەگىنشە، 4 كىسى كوروناۆيرۋستان قايتقان. ەمدەلىپ جاتقان 4,5 مىڭ ادامنىڭ 2 306-سى اۋرۋحانالاردا، ال 2 251 ناۋقاس امبۋلاتورلىق باقىلاۋدا. سونداي-اق، جاعدايى اۋىر 121 ناۋقاس بار. ونىڭ 22-ءسى تىم اۋىر حالدە جاتىر. 23 ادام وكپەنى جاساندى جەلدەتۋ اپپاراتىنا قوسىلعان.

وتكەن تاۋلىكتە كوروناۆيرۋس پنەۆمونياسىنا شالدىققان 7 ادامنىڭ جاعدايى وڭالماي، ومىردەن وتكەن.  بىراق دەنساۋلىق ساقتاۋ مينيسترلىگى اتالعان اۋرۋدىڭ كۇندەلىكتى كەيستەرىن ايماقتار بويىنشا جاريالامايدى. ايتپەسە بۇعان دەيىن ايماقتىق ءبولىنىسىن كەمىندە اپتا سايىن اشىق دەرەككوزدە جاريالاۋعا بىرنەشە رەت ءسوز بەرگەن. ۆەدومستۆو ۇيىمدارىندا 13 قىركۇيەك ناۋقاستار سانى از تىركەلگەنىمەن، قايتىس بولعانداردىڭ سانى كۇرت وسكەن. مۇنىڭ سەبەبى ءالى بەلگىسىز. كوروناۆيرۋس پنەۆمونياسىنا شالدىققاندار تۋرالى بيلىك تۇششىمدى اقپارات بەرمەيدى. ەشبىر رەسمي رەسۋرستا كوروناۆيرۋس سياقتى اۋىرعانداردىڭ سانى، ايماقتارداعى ۇلەسى، كلينيكالىق جاعدايى، جاس قۇرامى تۋرالى پارامەترلەر مۇلدەم جاريالانبايدى.

1 تامىزدان بەرى كوروناۆيرۋس پنەۆمونياسىنا شالدىققان  29 658 ادامنىڭ نەبارى 6 853-ءى جازىلعان. 13 ناۋرىزدان بەرى بيلىك مويىنداعان 106 855 ناۋقاستىڭ 100 مىڭدايى ايىققان.

ددسۇ مالىمەتىنشە، قازاقستاندا اۋىرعانداردىڭ سانى 136 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەپ كەلەدى.

پاندەميا باستالعالى جالپى جيىنى ۆيرۋس جۇققانداردىڭ 2 575-ءسى  (كۆي+ / U07.1 – 1 671, كۆي- / U07.2 – 328, ىلەسپە اۋرۋلاردان – 576) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 576 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

13 قىركۇيەكتەگى احۋال بويىنشا دەنمين دەرەگى

"The Qazaq Times"