تيحانوۆسكايا رەسمي مالىمدەمە جاسادى

پرەزيدەنتتىك سايلاۋدان كەيىن باستالعان بەلارۋستەگى نارازىلىقتار بيلىكتەگىلەر ورنىنان كەتپەيىنشە، جالعاساتىن بولادى. بۇل تۋرالى NHK تەلەارناسىنا سۇحبات بەرگەن سۆەتلانا تيحانوۆسكايا مالىمدەدى.

«ءبىزدىڭ بار سەنىمىمىز، كۇشىمىز حالىقتا. كۇن سايىن دەمونستراتسيالار بيلىككە جەتكىلىكتى قىسىم جاسايدى. مەن ارقاشان بەلارۋس حالقىمەن بىرگەمىن. بيلىك، جۇيە وزگەرمەيىنشە، نارازىلىق شەرۋلەرى جالعاسا بەرەدى»، – دەدى.

سونىمەن قاتار ماسكەۋدىڭ ىشكى جاعدايعا ارالاسۋىنا الاڭداۋشىلىق بىلدىرگەن تيحانوۆسكايا قازىرگى پرەزيدەنت لۋكاشەنكونىڭ رەسەيمەن تىعىز بايلانىس ورناتقانىن ايتتى.

9 تامىزدا بەلارۋستە پرەزيدەنت سايلاۋى ءوتتى. ورتالىقسايلاۋ كوميسسياسى قازىرگى مەملەكەت باسشىسى الەكساندر لۋكاشەنكو 80,10% داۋىسپەن جەڭىسكە جەتكەنىن جاريالادى. ونىڭ باستى باسەكەلەسى، وپپوزيتسيا اتىنان قاتىسقان سۆەتلانا تيحانوۆسكايا 10,12% داۋىسقا يە بولدى.

تيحانوۆسكايا سايلاۋ قورىتىندىسى بويىنشا ورتالىق سايلاۋ كوميسسياسىنا شاعىم ءتۇسىردى. ەكزيت-پولدىڭ ناتيجەلەرى 9 تامىز كەشكە جاريالانعاننان كەيىن مينسكتىڭ ورتالىعىندا جانە رەسپۋبليكانىڭ كەيبىر باسقا قالالارىندا جاپپاي نارازىلىق باستالدى. شەرۋگە شىققانداردى قۇقىق قورعاۋ ورگاندارىنىڭ قىزمەتكەرلەرى سوققىعا جىعىپ، كوز جاساۋراتاتىن گاز قولدانعان. ىشكى ىستەر مينيسترلىگىنىڭ حابارلاۋىنشا، ميتينگتەر كەزىندە 6 مىڭعا جۋىق ادام ۇستالدى، ونداعان پوليتسيا قىزمەتكەرلەرى مەن دەمونسترانتتار جاراقات الدى.

3 قىركۇيەكتە ۋاشينگتون ەۋروپاداعى سەرىكتەستەرىمەن اۆتوريتارلىق باسقارۋ جۇيەسىندەگى بەلارۋسكە ەكونوميكالىق سانكتسيا ەنگىزۋ ماسەلەسىن تالقىلاعان. اقش مەملەكەتتىك حاتشىسىنىڭ ەۋروپالىق جانە ەۋرازيالىق ماسەلەلەر جونىندەگى كومەكشىسى دجوردج كەنتتىڭ مالىمدەۋىنشە، بەلارۋس تاقىرىبىندا ادام قۇقىقتارى مەن رەسەي بيلىگىنىڭ ىشكى ساياساتقا ارالاسۋى تىسقارى قالمايدى.

"The Qazaq Times"