ءۇندىستان ءوز ينتەرنەت نارىعىنداعى قىتايدىڭ جولىن كەستى

قىتاي مەن ءۇندىستان اراسىندا قايشىلىق بارعان سايىن كۇشەيە ءتۇستى. شەكارا داۋىن بىلاي قويعاندا الەمدە حالىق سانى ەڭ كوپ ەكى ەلدىڭ ازيا-تىنىق مۇحيت ايماعىندا باستى باسەكەلەس بولىپ سانالادى.

وتكەن اپتانىڭ سوڭىندا قىتاي ارمياسى داۋلى شەكارا ايماعىندا جۇرگىزگەن اسكەري ارەكەتتەرى ءۇندىستان جاعىنان ارانداتۋشىلىق دەپ تانىلدى جانە ءۇندى قارۋلى كۇشتەرى جاعىنان جاۋاپ قايتارىلدى. ەكى ەلدىڭ جوعارى اسكەري شەندىلەرى اراسىنداعى كەلىسسوز كەزدەسۋىنە قاراماستان ءبىر كۇن بۇرىن ءبىر ۇندىستاندىق جاۋىنگەر شەكارا ايماعىنا قويىلعان مينادان مەرت بولدى.

ءۇندىستان تارابى سارسەنبىدە جاساعان مالىمدەمەسىندە، قىتايدىڭ ارانداتۋشىلىق ارەكەتتەرىنە جاۋاپ رەتىندە قىتايلىق موبيلدىك باعدارلامالاردى شەكتەيتىنىن مالىمدەدى. ءۇندىستاندا شەكتەۋ قويىلعان قىتايلىق باعدارلامالار سانى 118-گە جەتتى. بۇلاردىڭ اراسىندا ءۇندىستاندا 50 ميلليوننان استام پايدالانۋشىعا يە PlayerUnknown's Battlegrounds ۆيدەو ويىندارى دا بار.

جاڭا-دەلي بيلىگى ءۇندىستاننىڭ كەڭ نارىعىنداعى قىتايلىق موبيلدىك قوسىمشالارىن شەكتەۋ ارەكەتىن بەيجىڭگە قارسى پارمەندى سوققى رەتىندە پايدالانىپ وتىرعانى بەلگىلى. ارينە، بۇل شارا قىتايدىڭ ءوسىپ كەلە جاتقان ەلەكترونيكا الىپتارى ءۇشىن سالماقتى سوققى بولماق. ايتالىق، Baidu, Alipay سياقتى كەيبىر تىيىم سالىنعان قىتاي قوسىمشالارى جانە WeChat بايلانىس باعدارلاماسىنىڭ كەيبىر نۇسقالارى قىتايدىڭ Tencent جانە Ant Financial سياقتى ءىرى ينتەرنەت كومپانيالارىنىڭ نەگىزگى تابىس كوزدەرى. بۇلار ءۇندىستاننىڭ كەڭ نارىعىن ءوزىنىڭ دامۋ الاڭى رەتىندە كورىپ كەلگەن ەدى.

اقش باستاعان باتىس ەلدەرىنىڭ قىتايمەن بولعان قايشىلىعىنىڭ شيەلەنىسۋىنە بايلانىستى قىتايلىق كومپانيالاردىڭ ءونىمىنىڭ بازارى بارعان سايىن تارالىپ بارا جاتىر. سونىڭ اراسىندا قىتايلىق جاڭا تەحنولوگيالار مەن ۇيالى بايلانىس قۇرىلعىلارى، موبيلدىك قوسىمشالارى دا بار. كوپتەگەن ەلدەردە قىتايلىق قوسىمشالار ۇلتتىق قاۋىپسىزدىككە قاتەر توندىرەدى دەپ تانىلعان.

“The Qazaq Times”