سولتۇستىك كورەيا بيلىگىندەگى ەكىنشى ادام: كيم جوڭ ۋن بيلىگىن ءبولىپ بەردى مە؟

وتكەن اپتادا وڭتۇستىك كورەيانىڭ بارلاۋ قىزمەتى سولتۇستىك كورەيانىڭ ەڭ جوعارى باسشىسى كيم جوڭ ۋننىڭ (كيم چەن ىن/Kim Jong Un) ءوزىنىڭ كەيبىر ماڭىزدى بيلىك وكىلەتتەرىن قارىنداسى كيم يو جوڭعا (Kim Yo Jong) ءبولىپ بەرگەنىن مالىمدەگەن. بۇعان قاراپ، كيم يو جوڭ بولاشاق كحدر ليدەرىنىڭ ورىنىن باسا ما دەگەن سۇراقتار تۋدا.

وڭتۇستىك كورەيا بارلاۋ قىزمەتىنىڭ مالىمەتى بويىنشا، كحدر ەڭ جوعارى بيلىگىندە كيم جوڭ ۋن قالا بەرەدى، تەك كەيىن ماڭىزدى بيلىك قۇقىقتارىن وتكەرىپ بەرەدى. بۇنى وزىنە دەگەن قىزمەتتىك جاۋاپكەرشىلىكتى جەڭىلدەتۋ ماقساتىندا جاساعان دەلىنگەن. سوعان ساي، كيم يو جوڭ بۇدان بىلاي سولتۇستىك كورەيانىڭ سىرتقى ساياساتىن بەلگىلەيدى جانە اقش پەن وڭتۇستىك كورەيا بويىنشا سويلەسۋلەردىڭ بارلىق شەشىمى سوعان تيەسىلى. وسىلايشا ول كحدر بيلىگىندەگى ەكىنشى ادامعا اينالادى.

فوتو: يونحاپ.

دەگەنمەن، وڭتۇستىك كورەيا بارلاۋ قىزمەتىنىڭ سولتۇستىك كورەيا جەرىندەگى بارلىق بارلاۋ مالىمەتتەرى تۋرا بولا بەرمەيتىنىن دە ەسكەرۋ كەرەك. بارلاۋ قىزمەتى ءوز مالىمەتتەرىن جابىق ەسىك باس قوسۋدا پارلامەنت مۇشەلەرىمەن بولىسكەن. الايدا، پارلامەنت مۇشەلەرى بۇل مالىمەتتەردى جۋرناليستەرگە تاراتىپ جىبەرگەن.

وڭتۇستىك كورەيا بارلاۋ قىزمەتىنىڭ بۇل مالىمەتتەرىنە كۇمان كەلتىرىپ وتىرعان ەكسپەرتتەر دە بار. كەيبىر اقپارات كوزدەرى بۇعان مۇلدە قايشى مالىمەتتەردى دە العا تارتادى. ايتالىق، كيم يو جوڭ تامىزدا وتكەن كحدر بيلىگىندەگى ماڭىزدى ەكى جينالىستا دا بولماعان، وسىعان قاراپ ونىڭ قىزمەتىن تومەندەتكەن دەگەن دە سوزدەر ايتىلعان.

بىراق، 32 جاستاعى كيم يو جوڭنىڭ سولتۇستىك كورەيادا تاسى ورگە دومالاماسا، تومەن تارتپايتىن ادام ەكەنى ءمالىم. ول بىلتىردان بەرى سولتۇستىك كورەيانىڭ سىرتقا قاراتقان ماڭىزدى شەشىمدەرىن ءبىرىنشى بولىپ جاريالاپ كەلەدى. سولتۇستىكتىڭ وڭتۇستىككە دەگەن مامىلەسىنىڭ كۇرت وزگەرگەنى تۋرالى دا ماڭىزدى مالىمدەمە يو جوڭنىڭ اۋزىمەن ايتىلىپ ەدى. ول ەڭبەكشىلەر پارتياسى ساياسي بيۋروسىنىڭ تۇراقتى مۇشەسى جانە ورتالىق بيلىكتەگى ماڭىزدى ادامداردىڭ ءبىرى.

“The Qazaq Times”