زىمىرانعا قارسى جۇيە كورەي تۇبەگىن قورعاۋ ما الدە، قىتايدى تەجەۋ مە ؟

بۇۇ قاۋىپسىزدىك كەڭەسى 6 ءساۋىر كۇنى باق-قا بەرگەن حابارىندا، سولتۇستىك كورەيانىڭ جاقىندا بالليستيكالىق زىمىرانداردى ۇشىرۋ ءىسىن قاتاڭ ايىپتاپ، قاۋىپسىزدىك كەڭەسىنىڭ بەلگىلەمەسىن اۋىر دارەجەدە بۇزعانىن سىنعا الدى. زىمىرانعا قارسى قۇرلىعىنىڭ كورەي تۇبەگىنىڭ قاۋىپسىزدىگىن ساقتاۋداعى ماڭىزدىلىعىن قۋاتتادى. سونىمەن بىرگە سولتۇستىك كورەياعا قاۋىپسىزدىك كەڭەسىنىڭ شەشىمىنە تولىق مويىنسۇنۋى كەرەك دەگەن ەسكەرتۋىن جاسادى. بۇل تۋرالى «Sina.News» حابارلاپ وتىر.

بۇۇ قاۋىپسىزدىك كەڭەسىنىڭ بۇل مالىمدەمەسى، كورەي تۇبەگىندەگى زىمىرانعا قارسى «ساد» جۇيەسىنىڭ ورناتىلۋىنا جاساعان قولداۋى دەپ ساناۋعا بولادى. ال «ساد» جۇيەسىنىڭ ورناتىلۋىنا قارسى سولتۇستىك كورەيا، قىتاي، رەسەي ءۇشىن بۇل شەشىم ۇناي قويمايدى. دەسە دە، قاۋىپسىزدىك كەڭەسى سولتۇستىك شىعىس ازياداعى قايشىلىقتى ديپلوماتيالى، بەيبىت تۇردە ساياسي شەشىمدەر ۇسىنا وتىرىپ بىرجاقتىلى ەتۋدى ۇسىندى.

سولتۇستىك كورەيانىڭ بالليستيكالىق زىمىراندار مەن قۋاتتى يادرولىق قارۋ سىناقتارىن كەڭەيتۋى وڭتۇستىك كورەيا، جاپونيا، اقش ءۇشىن اسا قاۋىپتى بولارى ءسوزسىز. اقش سولتۇستىك كورەيانى بىردەن ءبىر يادرولىق سوعىس قاۋپىن تۋدىرۋشى ەل دەپ سانايدى. ال سولتۇستىك كورەيا اقش-تى كورەي تۇبەگىن بولشەكتەۋشى، كورەياعا قارسى سۇرقيا ساياسات قولدانىپ وتىرعان مەملەكەت دەپ بىلەدى. ەكى كورەي ەلىنىڭ اراسىنداعى جانجالدىڭ ارىندا اقش پەن قىتاي وتىر. ترامپ تاققا وتىرعالى بەرى، جاپونيا شىعىس ازياداعى اقش-تىڭ تاعى ءبىر سەنىمدى سەرىگىنە ايلانىپ شىعا كەلدى. ەندى سولتۇستىك كورەيا مەن قىتاي قاتارىنا رەسەيدى تارتىپ وتىر.

وڭتۇستىك كورەيا ەل ازاماتتارىنىڭ ءبىر ءبولىمىنىڭ قارسىلىق شارالارىنا قاراماستان، «ساد» زىمىرانعا قارسى جۇيەسىن ورنالاستىرۋدىڭ سوڭعى جۇمىستارىن اياقتاۋ الدىندا تۇر. قىتايدىڭ ءتورت نەگىزگى اسكەري بازالارىنىڭ ۇشەۋىن قامتيتىن بۇل جۇيە ورناتىلسا، بولاشاق قىتاي ۇلى قۇرلىعىنان كوتەرىلگەن بارلىق وق جولىندىق راكەتالاردى ەل شەكاراسىنان شىعارماي اتىپ تۇسىرۋگە قابلەتتى.

“The Qazaq Times”