كرەمل اقش مەملەكەتتىك حاتشىسى پومپەونىڭ اقش پەن رەسەيدىڭ قىتايعا قارسى بىرلەسىپ جۇمىس جاساۋى تۋرالى ۇسىنىسىن قابىلدامادى. رەسەي پرەزيدەنتى ۆلاديمير ءپۋتيننىڭ وكىلى ماسكەۋ مەن بەيجىڭ «ەرەكشە سەرىكتەستىك بايلانىس» ورناتقانىن ايتتى.

اقش-قىتاي ساۋدا سوعىسى باستالعاننان بەرى، اسىرەسە جاھاندىق ىندەتتەن كەيىن ترامپ اكىمشىلىگى قىتاي ساۋدا، تەحنولوگيا جانە اسكەري ماسەلەلەر بويىنشا اقش-قا قاۋىپ توندىرەدى دەپ سانايدى. وسى ايدىڭ باسىندا اقش فەدەرالدى بارلاۋ اگەنتتىگىنىڭ جەتەكشىسى دە قىتايدى قۇراما شتاتتارعا ەڭ ۇلكەن قاۋىپ ءتوندىرۋشى دەپ اتادى.

Financial Times باسىلىمى اقش-تىڭ رەسەيدى قارىم-قاتىناستى جاقسارتۋعا شاقىرىپ جاتقانىن جازۋدا. الايدا، وتكەن اپتادا قۇراما شتات بيلىگى رەسەي مەن قىتايعا قارسى وداق قۇرۋ تۋرالى مالىمدەمە جاساعان بولاتىن.

رەسەي پرەزيدەنتىنىڭ ءباسپاسوز حاتشىسى پەسكوۆ وتكەن اپتادا رەسەيدىڭ باسقا ەلدەرگە قارسى وداقتارعا قوسىلمايتىندىعىن، بارلىق رەسەيلىك ساياسي وداقتاردىڭ «تاتۋ كورشىلىك جانە ءوزارا ءتيىمدى قاتىناستاردى دامىتۋ» ءۇشىن ەكەنىن ايتقان. ول سونىمەن بىرگە رەسەي مەن قىتايدىڭ «تاتۋ كورشىلىك، سەرىكتەستىك» بايلانىسى بار ەكەنىن باسا ايتقان بولاتىن.

وسى ايدىڭ باسىندا رەسەي ءسىم باسشىسى سەرگەي لاۆروۆ اقش پەن قىتاي اراسىنداعى ساۋدا سوعىسى رەسەيدىڭ نەمەسە باسقا ەلدەردىڭ مۇددەسىنە سايكەس كەلمەيتىنىن جەتكىزگەن. ول بەيجىڭ مەن ۋاشينگتون ارا-قاتىناسى ديپلوماتيالىق ارنالار ارقىلى شەشىم تابۋىن ءۇمىت ەتكەن.

قۇراما شتاتتاردىڭ وداق"قىتايعا قارسى وداق" تۋرالى ۇسىنىسى ماسكەۋ جاعىنان قولداۋ تاپپادى. رەسەي مەن قىتايدىڭ كوپ سالاداعى قارىم-قاتىناسى تىعىز. پرەزيدەنت پۋتين ءوز مالىمدەمەلەرىندە اقش-قىتاي قايشىلىعىندا بەيتاراپ قالۋ ۇستانىمىن ءسوز ەمەۋرىنىمەن ءبىلدىرىپ كەلەدى.

"The Qazaq Times"