بيلىك بالادان اقشا ايادى

قازاقستاندا بالا تۋعاندا بەرىلەتىن جاردەماقى ازايدى. ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا الەۋمەتتىك سالاعا بولىنەتىن شىعىستاردىڭ 5 ملرد 720 ملن تەڭگەگە قىسقارعانىن مالىمدەدى. ۆەدومستۆونىڭ مۇنداي شەشىم قابىلداۋىنا - ەلىمىزدە بىلتىرعى جىلى بالا تۋ كورسەتكىشىنىڭ كۇرت تومەندەپ كەتكەنى تۇرتكى بولىپتى-مىس.

مينيستر ايتقان دەرەككە سەنسەك، 2017 جىلى حالىق سانى الدىڭعى جىلمەن سالىستىرعاندا 19 مىڭ ادامعا كەمىگەن. بالا تۋ كورسەتكىشى 6,2 پايىزعا ازايىپتى. سابيلەر سانى سيرەدى دەپ، تولەمدەردى ساپ تىيعان ۆەدومستۆو - قازىنا قاراجاتىن وسىلاي ۇنەمدەۋدى قۇپ كورسە كەرەك. ولار، ءتىپتى، 2020 جىلعا دەيىن قازاقستاندا بالا سانى ايتارلىقتاي كوبەيمەيدى دەگەن بولجام دا جاساپ قويعان.

وسى تۇستا، ىرگەلەس ەلدەردىڭ دەموگرافيالىق احۋالدى جاقسارتۋ ءۇشىن انا مەن بالاعا بەرىلەتىن تولەمدەردى جاپپاي كوبەيتىپ جاتقانىن ايتقان ءجون. ماسەلەن، رەسەيدە «انا كاپيتالى» دەگەن باعدارلاما ارقىلى بوسانعان ايەلدەر مەملەكەتتەن 453 026 رۋبل الادى ەكەن. ول شامامەن 8000 دوللارعا جۋىقتايدى. وسىلايشا، كورشى ەلدەر حالىق سانىن ارتتىرۋعا تالپىنىپ جاتقاندا، ءبىزدىڭ بيلىك بالا سانىن كوبەيتپەۋدىڭ امالىن ويلاپ جاتقانداي.

“The Qazaq Times”