«وپپوزيتسيالىق الاڭ – ءومىر ءۇشىن» ۋكراينالىق پارتياسى ەل پرەزيدەنتى ۆلاديمير زەلەنسكيدىڭ وتستاۆكاعا كەتۋىن تالاپ ەتىپ وتىر. وپپوزيتسيا مۇنىڭ سەبەبىن مەملەكەت باسشىلىعىنىڭ قيىن ەكونوميكالىق ماسەلەگە توتەپ بەرە الماۋىمەن، سونداي-اق شەشىم قابىلداۋدا باتىس نەسيە بەرۋشىلەرگە تاۋەلدىلىگىمەن بايلانىستىرادى.

ساۋىردە زەلەنسكيدىڭ بۇيرىعىمەن ۋكراينا ۇكىمەتى كوروناۆيرۋس پاندەمياسىنا جانە ەكونوميكالىق قۇلدىراۋعا بايلانىستى شەنەۋنىكتەر مەن مەملەكەتتىك كومپانيالارعا بەرىلەتىن اي سايىنعى تولەم مولشەرىن ەداۋىر ازايتقان. سوعان قاراماستان، وپپوزيتسيالىق پارتيا قازىرگى پرەزيدەنتتىڭ وتستاۆكاسىن تالاپ ەتىپ وتىر.

ۋكراين وپپوزيتسيالىق پارتياسىنىڭ رەسمي سايتىندا: «زە-ۇكىمەتتىڭ (رەد. زەلەنسكيدىڭ ساياسي توبى) سىرتقى وتارشىلدىق باسقارۋ دەڭگەيىنە دەيىن قۇلدىرادى. بۇل جاعداي پوروشەنكو كەزىندە دە بولعان. قازىر بيلىك سىرتقى نەسيە بەرۋشىلەردىڭ نۇسقاۋلارىن ورىنداۋ، شەتەلدىك قارجى الىپساتارلارىنىڭ پايداسىن قامتاماسىز ەتۋ، ۇلتتىق بايلىقتى ساتۋمەن اينالىسىپ جاتىر. سول ارقىلى شەنەۋنىكتەر مەن سىرتقى اكىمشىلىك اگەنتتەرى پايدا كورۋدە. زە-كومانداسى ۋكراينانى تولىعىمەن قۇلدىراتپاي تۇرعاندا، وتستاۆكاعا كەتۋى كەرەك»، – دەلىنگەن.

وپپوزيتسيانىڭ تالابى جوعارعى رادانىڭ شەنەۋنىكتەر جالاقىسىنا شەكتەۋلەردى الىپ تاستاۋ تۋرالى زاڭ جوباسىن قايتا قاراۋ. پارتيا وكىلدەرى: «زەلەنسكي كۇن تارتىبىندەگى باستى ماسەلە رەتىندە پوروشەنكو فراكتسياسى ازىرلەگەن №3708 زاڭ جوباسىن قاراۋ ءۇشىن پارلامەنتتىڭ كەزەكتەن تىس سەسسياسىن شاقىرۋدى تالاپ ەتەدى. سەبەبى شەنەۋنىكتەر ميلليونداعان بونۋستار مەن قارجىنى قايتارىپ العىسى كەلەدى. وسى رەتتە «وپپوزيتسيالىق الاڭ – ءومىر ءۇشىن» پارتياسىنىڭ وكىلدەرى بيلىكتەن حۆق-نىڭ حالىققا قارسى تالاپتارىن ورىنداۋدى توقتاتۋدى، بيلىك اگەنتتەرى ءبىر-ءبىرىن قورەكتەندىرەتىن زاڭدى الىپ تاستاۋدى تالاپ ەتەدى»، – دەيدى.

پارتيا بۇل زاڭ جوباسىنا قارسى داۋىس بەرىپ قانا قويماي، شەنەۋنىكتەر مەن مەملەكەتتىك كومپانيالاردىڭ باسشىلارىنا تولەنەتىن تولەمدى ون ەڭ تومەنگى جالاقى دەڭگەيىندە – 47,2 مىڭ گريۆەن (1750 دوللار) مولشەرىندە شەكتەيتىن قۇجات قابىلداۋدى تالاپ ەتىپ وتىر.

«ەل ەكونوميكاسى داعدارىستا. بيۋدجەتتى تولتىرۋدا ۇلكەن پروبلەمالار بار. حالىقارالىق ۇيىمداردىڭ مالىمەتى بويىنشا، جىلدىڭ اياعىنا دەيىن ۋكراينادا حالىقتىڭ جارتىسىنان كوبى كەدەيشىلىكتە ءومىر ءسۇرۋ قاۋپى بار»، – دەپ اتاپ ءوتتى پارتيا.

"The Qazaq Times"