22 ماۋسىمدا قىتاي مەن ءۇندىستان شەكارا قىزمەتىنىڭ جوعارى اسكەري شەندىلەرى كەزدەسىپ، ءۇندى-قىتاي شەكارا قايشىلىعىن شەشۋگە تىرىستى. ۇندىستاندىق ساراپشىلار وسى رەتتەگى قاقتىعىس اسكەري جانە ەكونوميكالىق شىعىنى جاعىنان سوڭعى 50 جىلداعى ەڭ ءىرى قاقتىعىس دەپ باعالاعان بولاتىن.

Reuters اقپاراتتىق اگەنتتىگى ءۇندىستان ۇكىمەتىندەگى دەرەككوزدەرگە سىلتەي وتىرىپ، قىتاي مەن ءۇندىستان اسكەري باسشىلارى شەكارا باقىلاۋ سىزىعىندا وتكەن بەيسەنبىدە ەكى جاقتى كەزدەسۋ وتكىزگەنىن حابارلاعان.

ەستەرىڭىزدە بولسا، قىتاي مەن ءۇندىستان شەكاراشىلارى اراسىندا 15 ماۋسىمدا قاقتىعىس بولىپ، ءۇندىستان تارابى 20 شەكاراشىنىڭ قازا بولعانىن مالىمدەگەن بولاتىن. ەكى ەلدىڭ شەكاراشىلارى قاقتىعىس كەزىندە تاستارمەن، تەمىر جانە اعاش تاياقتارمەن سوققى جاساعان. قىتاي ءوز تاراپىنداعى ءولىم-ءجىتىم، جاراقات العان اسكەرلەر سانىن اشىق كورسەتكەن جوق. بىراق، ءۇندىستان تارابى كورسەتكەن مالىمەتتە قىتاي شەكاراشىلارىنان كەمىندە 40 ادام قازا تاپقان بولۋى مۇمكىن دەلىنگەن.

قاقتىعىس بويىنشا جاڭا-دەلي مەن بەيجىڭ ءبىر-ءبىرىن كەزەك ايىپتادى، بىراق قوس تاراپتا قاقتىعىستىڭ ودان ارى ۋشىعۋىنا جول بەرگىسى كەلمەدى. شەكارالىق قايشىلىق يادرولىق دەرجاۆالار اراسىنداعى قاقتىعىستى ءورشىتىپ جىبەرۋى مۇمكىن ەدى.

قاقتىعىس كەزىندە ءۇندى مەن قىتاي شەكاراشىلارىنىڭ وق اتىسپاۋىنا 1966 جىلى قول قويعان كەلىسىم ماجبۇرلەگەن. بىراق، ۇندىستانداعى باق-تىڭ حابارلاۋىنشا ءۇندى بيلىگى اتالعان ەرەجە تۋراسىندا قايتا قاراۋى مۇمكىن ەكەن. وعان قوسا، ءۇندىستاننىڭ قورعانىس ءمينيسترى ن.سينگح جەكسەنبى كۇنى ارميا گەنەرالدارىنا بۇيرىق بەرىپ، ءۇندى اسكەريلەرىنىڭ «دايىن بولۋىن» تاپسىرعان، ءارى قورعانىس كۇشتەرى شەكارا سىزىعندا باتىل ارەكەت ەتەتىنىن ەسكەرتكەن.

ۇندىستاندىق باسىلىمداردىڭ دۇيسەنبىدەگى حابارىندا، دەلي بيلىگى ءۇندىستان ارمياسىنان شەكارانى كۇزەتۋدىڭ باسقا ءتاسىلىن پايدالانۋدى تالاپ ەتكەنى ايتىلدى. بۇل قىتايمەن شەكارانى باقىلاۋعا قاتىستى ەكەنى انىق. سونداي-اق، قازىرگى ساتتە ءۇندىستان شەكارا اسكەريلەرىنىڭ سانىن كوبەيتۋدە.

شەكارا قايشىلىعى ۇندىستانداعى قىتايعا دەگەن قارسىلىقتى كۇشەيتتى. ەلدەگى كاسىپكەرلەر فەدەراتسياسى ۇيىمى ( قۇرامىندا 70 ملن كاسىپكەر بار) بيلىكتەن قىتاي تاۋارلارىنا بويكوت جاريالاۋدى جانە قىتاي كومپانيالارىنا بەرىلگەن كوممەرتسيالىق كەلىسىمشارتتاردىڭ كۇشىن جويۋدى تالاپ ەتىپ وتىر.

"The Qazaq Times"