فوتو: ratel.k

قازاق, قىرعىز، ارمەن، ورىس جانە بەلارۋس پرەزيدەنتتەرى قۇرىلعالى باسى داۋدان اجىراماعان ەۋرازيالىق ەكنوميكالىق وداقتىڭ كەلەسى بەس جىلدىق دامۋ ستواتەگياسىن قابىلداي المادى. بۇل تۋرالى ورتالىق ازيا جاڭالىقتار قىزمەتى جاريالادى.

19 مامىرداعى ۆيدەوكونفەرەنتسيا فورماتىندا (كوروناۆيرۋس پاندەمياسىنا بايلانىستى) وتكەن وداق ىشىندەگى جوعارعى ەۋرازيالىق ەكونوميكالىق كەڭەستىڭ وتىرىسىندا قازاقستان پرەزيدەنتى قاسىم-جومارت توقاەۆ جوبانىڭ ىشىندە "ەۋرازيالىق ەكونوميكالىق ينتەگراتسيانىڭ 2025 جىلعا دەيىنگى دامۋ ستراتەگياسى تۋرالى جوبانى" "تولىقتىرۋ قاجەت" دەپ سانايدى.

توقاەۆتىڭ پايىمداۋىنشا، ستراتەگيادا اكىمشىلىك جانە قىلمىستىق جاۋاپكەرشىلىكتى انىقتاۋ، كەدەن ءىسى، تەحنيكالىق رەتتەۋ، تۇتىنۋشىلار قۇقىعىن قورعاۋ سىندى سالالار تالاپقا ساي كەلمەيدى. سوزىنشە، بۇل ستراتەگيا ۇكىمەت پەن پارلامەنتتىڭ دەربەستىگىن شەكتەيدى.

"الداعى بىرنەشە جىلعا ارنالعان ينتەگراتسيانىڭ نەگىزىن قالايتىن اتالعان قۇجاتتىڭ ەرەكشە ماڭىزدى ەكەنىن ەسكەرە وتىرىپ، ونى ءالى دە تالقىلاپ، بەتپە-بەت كەزدەسۋ بارىسىندا قابىلداعان ءجون. ەرتە مە، كەش پە، ءبىز ءبىر-بىرىمىزبەن كەزدەسەمىز" دەدى توقاەۆ.

كرەملدىڭ حابارلاۋىنشا، رەسەي پرەزيدەنتى ۆلاديمير پۋتين وداقتىڭ رەتتەۋ ورگانى سانالاتىن ەۋرازيالىق ەكونوميكالىق كوميسسياسىنىڭ (ەەك) ۇيىمداستىرۋ ءرولىن ارتتىرۋدى ۇسىندى.

ال اقوردا سايتىنىڭ جازۋىنشا، توقاەۆ "ەۋرازيالىق ەكونوميكالىق كوميسسيانىڭ وكىلەتىن كەڭەيتۋ ماسەلەسىن مۇقيات قاراۋعا شاقىرعان". ونىڭ سوزىنشە، ەەك وكىلەتىنە دەنساۋلىق ساقتاۋ مەن ءبىلىم بەرۋدى ەنگىزۋ ەۋرازيالىق ەكونوميكالىق وداقتى قۇرۋ تۋرالى 2015 جىلعى كەلىسىمگە قاراما-قايشى كەلەدى.

بەلارۋس پرەزيدەنتى الەكساندر لۋكاشەنكونىڭ سايتىنىڭ حابارلاۋىنشا، توقاەۆ "اسىعىس شەشىم قابىلداماي", ستراتەگيالىق قۇجاتتى "ابدەن پىسىقتاپ قابىلداۋدى" ۇسىنعان.

تاراپتار ستراتەگيانى "جالپى" قولداعان، بىراق قابىلدامادى.

ەۋرازيالىق ەكونوميكالىق وداقتى 2015 جىلى رەسەي، قازاقستان جانە بەلارۋس ۇشتىگى قۇرعان. رەسەي ۇستەمدىگى بايقالاتىن وداققا كەيىن ارمەنيا مەن قىرعىزستان مۇشە بولدى. تاعى ءبىر پوستسوۆەتتىك ەل – مولدوۆا باقىلاۋشى. قازىر وزبەكستاننىڭ باقىلاۋشى ءرولى تالقىلانىپ جاتىر.

"The Qazaq Times"