ەۋروكوميسسيا وداققا مۇشە ەلدەرگە كارانتيننەن بىرتىندەپ شىعۋ جونىندە ۇسىنىس ءبىلدىردى. بۇل شارا بىرنەشە كەزەڭمەن ءوتۋى ءتيىس.

العاشىندا وقۋ ورىندارى، كەيىن ساۋدا ورتالىقتارى اشىلادى. ءدامحانالار مەن مەيرامحانالار سانى شەكتەلگەن قوناقتاردى قابىلداۋىنا بولادى. تەك وسىدان كەيىن بۇقارالىق شارالار وتكىزۋگە رۇقسات بەرىلمەك. ەگەر دەرت قاۋپى ايتارلىقتاي باسەڭدەسە، وداققا مۇشە ەلدەر اراسىندا، ال كەيىن سىرتقى شەكارالاردى اشۋ ماسەلەسى قاراستىرىلادى.

ەۋروكوميسسيا پرەزيدەنتى ۋرسۋلا فون دەر ليايەن: «ءبىزدىڭ نۇسقاۋ كارانتين ءتارتىبىن الىپ تاستاۋ كەرەك دەگەن ءسوز ەمەس. ءبىز تەك شەكتەۋ شارالارىن بىرتىندەپ جەڭىلدەتۋگە شاقىرامىز. ول ءۇشىن ارينە ۆيرۋستىڭ تارالۋى ەداۋىر ازايعانى جونىندە ەپيدەميولوگيالىق دالەل بولۋى ءتيىس. ەكنشى ماڭىزدى شارت – دەنساۋلىق ساقتاۋ جۇيەسىنىڭ مۇمكىندىگىن ارتتىرۋ كەرەك. سونداي-اق اۋىرعان ادامداردىڭ جاعدايى ۇنەمى باقىلاۋدا بولعانى دۇرىس»، — دەدى.

ەۋروپا ەلدەرىندە ىندەتتىڭ تارالۋ قارقىنى باسەڭدەگەن. الايدا دەرت جۇقتىرۋ قاۋىپى ءالى دە جوعارى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، ەۋرووداق اۋماعىندا 944 مىڭ ادام كوروناۆيرۋس جۇقتىرىپ، 80-مىڭنان استامى كوز جۇمدى. قاۋىپتى ىندەتپەن كۇرەسكە ەۋرووداق 3 تريلليون ەۋرو جۇمساعان.

"The Qazaq Times"